نئی دہلی: سپریم کورٹ میں لکھیم پور کھیری قتل کیس میں ہائی کورٹ کے ایک ریٹائرڈ جج کو تحقیقات کی نگرانی کی ذمہ داری سونپنے پر جمعہ کے روز کوئی فیصلہ نہیں سنایا گیا اور اس معاملے پر پیر کے روز فیصلہ ہو سکتا ہے۔چیف جسٹس این وی رمن، جسٹس سوریہ کانت اور جسٹس ہیما کوہلی کی بنچ نے جمعہ کے روز حکومت اتر پردیش کی طرف سے پیش ہونے والے سینئر وکیل ہریش سالوے کی درخواست پر سماعت پیر کے روز تک ملتوی کر دی۔سپریم کورٹ نے گزشتہ سماعت کے دوران پنجاب اور ہریانہ ہائی کورٹ کے ریٹائرڈ ججوں جسٹس رنجیت سنگھ اور جسٹس راکیش کمار جین کے نام تجویز کیے تھے ۔ بنچ نے ریاستی حکومت کو تجویز دی تھی کہ وہ دونوں ججوں میں سے کسی ایک سے تحقیقات کی نگرانی کرائے ۔حکومت اتر پردیش کی طرف سے پیش ہونے والے وکیل ہریش سالوے نے سماعت شروع ہوتے ہی بنچ کے سامنے کہا کہ وہ کچھ کام کر رہے ہیں۔ سماعت پیر کے روز تک ملتوی کی جائے ۔گزشتہ سماعت کے دوران انہوں نے بنچ کو یقین دلایا تھا کہ لکھیم پور کھیری کیس کی تحقیقات کے لیے قائم کردہ ایس آئی ٹی کی نگرانی کے لیے سپریم کورٹ کی طرف سے تجویز کردہ ججوں کے ناموں پر حکومت جمعہ کے روز اپنی رائے پیش کرے گی۔