لندن ۔ 16 اگسٹ (سیاست ڈاٹ کام )انگلینڈ کی فٹبال ٹیم لیورپول نے اپنی ہی ہم وطن ٹیم چیلیسی کو یوئیفا سوپر کپ میچ میں شکست دے کر خطاب جیت لیا۔یوئیفا چمپیئنز لیگ 2019 کی فاتح اور یوئیفا یورپا کپ 2019 کی فاتح چیلسی کے درمیان سوپر کپ کا خطابی میچ ہوا۔ میچ کے ابتدا میں چلیسی حریف ٹیم پر حاوی رہی اور پہلے ہاف کے 36ویں منٹ میں اولیفر جیراڈ نے گیند کو جال میں پھینک کر اپنی ٹیم کو 0-1 کی برتری دلوادی اور پہلے ہاف کا اختتام اسی برتری کے ساتھ ہوا۔ دوسرے ہاف کے آغاز میں لیورپول کی ٹیم مختلف انداز میں دکھائی دی اور 48ویں منٹ میں ساڈیو مینے نے گول کرکے اسکور 1-1 سے برابر کردیا۔دوسرے ہاف کے اختتام پر اسکور 1-1 سے برابر رہا جس کے بعد میچ کے نتیجے کے لیے اضافی وقت دیا گیا جس کے دوسرے ہی منٹ میں لیورپول نے ساڈیو مینے کے گول کی مدد سے 1-2 کی سبقت حاصل کرلی۔ تاہم چیلسی کے جورگینیو نے 101ویں منٹ میں پنالٹی شوٹ کا فائدہ اٹھاتے ہوئے گول کیا اور ایک مرتبہ پھر اسکور 2-2 سے برابر ہوگیا۔اضافی وقت کے اختتام پر میچ 2-2 سے برابر رہا جس کے بعد میچ کا فیصلہ پنالٹی اسٹروک پر ہوا۔لیورپول نے اپنے تمام پانچوں اسٹروک جال میں پہنچا دیے جبکہ چیلسی کے کھلاڑی بھی گیند کو ابتدائی 4 اسٹروک کے دوران اسکور کرنے میں کامیاب ہوئے، تاہم لیورپول کے گول کیپر آڈریان آخری پنالٹی روک کر ہیرو بن گئے اور یوئیفا چمپیئنز لیگ 2019 کی فاتح سوپر کپ کی بھی فاتح بن گئی۔خیال رہے کہ فٹبال سوپر کپ یورپین فٹبال کلبس کے مابین کھیلا جانے والا ایک میچ پر مشتمل ایونٹ ہے جو یوئیفا یورپا چمپیئن اور یوئیفا چیمپیئنز لیگ کی فاتح ٹیموں کے مابین کھیلا جاتا ہے۔
