لہیہ،28ستمبر(یو این آئی)لیہہ شہر میں چہارشنبہ کی شام بھڑکے تشدد کے بعد عائد کرفیو اتوار کو پانچویں روز بھی نافذ رہا، گزشتہ روز چار گھنٹوں کے لیے پابندیوں میں نرمی دی گئی تھی جس دوران کوئی ناخوشگوار واقع رونما نہیں ہوا۔ حکام کے مطابق لیفٹیننٹ گورنر کویندر گپتا آج ایک اعلیٰ سطحی سکیورٹی جائزہ میٹنگ کی صدارت کریں گے ، جس میں پابندیوں میں مزید نرمی دینے یا نہ دینے کا فیصلہ کیا جائے گا۔ اطلاعات کے مطابق چہارشنبہکے روز لیہہ اپیکس باڈی کی جانب سے ریاستی درجہ اور لداخ میں چھٹے شیڈول کے نفاذ کے مطالبے کو لے کر دی گئی ہڑتال کے دوران پرتشدد مظاہرے بھڑک اٹھے تھے ، جس میں چار افراد جان سے ہاتھ دھو بیٹھے جبکہ متعدد زخمی ہوئے ۔ پولیس نے اس واقعے کے بعد 50 سے زائد افراد کو گرفتار کرلیا۔ موسمیاتی کارکن سونم وانگچک کو بھی قومی سلامتی ایکٹ کے تحت حراست میں لے کر راجستھان کی جودھپور جیل منتقل کیا گیا ہے ۔ حکام کے مطابق اتوار کو شہر کی صورتحال مجموعی طور پر پرامن رہی اور کسی ناخوشگوار واقعے کی اطلاع نہیں ملی۔ تاہم موبائل انٹرنیٹ سروسز بدستور معطل ہیں اور پانچ یا اس سے زیادہ افراد کے جمع ہونے پر پابندی ہے۔
