حیدرآباد ۔ 21۔نومبر (سیاست نیوز) آندھراپردیش ہائی کورٹ میں سی پی آئی ماؤسٹ کے جنرل سکریٹری تروپتی عرف دیوجی اور ایم راجی ریڈی کے رشتہ داروں کی جانب سے حبس بیجا کی درخواست دائر کرتے ہوئے شکایت کی گئی ہے کہ یہ دونوں ماؤسٹ قائدین پولیس کی تحویل میں ہے۔ پولیس کی جانب سے دونوں ماؤسٹ قائدین کی تحویل سے انکار کیا گیا تاہم درخواست گزاروں کا ماننا ہے کہ حالیہ تلاشی مہم کے دوران پولیس نے دونوں کو اپنی تحویل میں لیا ہے ۔ پولیس نے عدالت کو بتایا کہ آندھراپردیش کے پانچ اضلاع میں 18 نومبر کو کئی ماؤسٹ کارکنوں کی گرفتاری عمل میں آئی تھی اور تمام کو عدالت کے روبرو پیش کردیا گیا۔ جسٹس سی ایچ منویندر ناتھ رائے اور جسٹس جی ٹی کمار پر مشتمل بنچ نے دیوجی کے بھائی گنگادھر اور راجی ریڈی کی دختر سنیہا لتا کی جانب سے دائر کی گئی درخواستوں کی سماعت کرتے ہوئے اپنے دعوے کے حق میں موجود ثبوت عدالت میں پیش کرنے کی ہدایت دی۔ عدالت نے کہا کہ اس طرح کے معاملات میں مداخلت ضرور کی جائے گی تاہم درخواست گزاروں کو حبس بے جا کے بارے میں ثبوت پیش کرنا چاہئے ۔ درخواست گزاروں کے وکلاء نے ثبوت پیش کرنے سے اتفاق کیا۔1
