نیویارک ۔ اقوام متحدہ نے مطالبہ کیا ہے کہ مائنمار میں جمہوریت بحال کی جائے اور تمام سیاسی قیدیوں بشمول آنگ سان سوچی کو رہا کیا جائے۔ جمعہ کو اقوام متحدہ نے جنوب مشرقی ایشیائی ممالک کی جانب سے مائنمار میں پرتشدد کارروائیوں کے خاتمہ کی اپیلوں کی بھرپور حمایت کی۔ یکم فروری کو مائنمار کی فوج نے ملک میں اقتدار پر قبضہ کر لیا تھا اور تب سے اس ملک میں جمہوریت پسند کارکن احتجاج میں مصروف ہیں۔ مظاہرین کے خلاف کریک ڈاؤن میں اب تک درجنوں افراد ہلاک ہو چکے ہیں۔
