ڈبلن۔ آئر لینڈ کی پارلیمنٹ کے ایوان زیریں کی ہونے والی ایک خصوصی میٹنگ میں ہفتہ کو یہاں ووٹنگ ہوئی جس میں فیانا فال پارٹی کے لیڈر مائیکل مارٹن کو نیا وزیر اعظم منتخب کیا گیا۔مقامی میڈیا نے اتوار کے روز یہ اطلاع دی۔آئرش پارلیمنٹ کے ایوان زیریں کے اسپیکر شان او فیئرگیل نے ووٹوں کے نتائج کا اعلان کرتے ہوئے کہا کہ مارٹن کے حق میں 93 جبکہ ان کے خلاف 63 ووٹ ڈالے گئے ۔ آئرش پارلیمنٹ کے موجودہ ایوان زیریں میں کل 160 نشستیں ہیں۔ آئرش نیشنل ریڈیو اور ٹیلی ویژن براڈکاسٹر آر ٹی ای کی اطلاعات کے مطابق فیانا فال کے سبھی 84 ممبران پارلیمنٹ نے مارٹن کو نئے وزیر اعظم کے لئے ووٹ کیا ، جبکہ نو آزاد امیدواروں نے بھی ان کی نامزدگی کے حق میں ووٹ دیا۔مارٹن نے اپنی جیت کے بعد ڈبلن کے کنونشن سینٹر کے 2،000 نشست والے آڈیٹوریم میں کووڈ 19 کے دور میں سوشل ڈسٹنسنگ کے ضابطہ پر عمل کرتے ہوئے ایک مختصر تقریر کی۔انہوں نے اپنی تقریر میں کہا کہ اس وقت کووڈ 19 وبا سے ملک کا کوئی بھی حصہ بچا ہوا ا نہیں ہے اور ایسے حالات میں حکومت کے لئے سب سے اہم کام اس وبا سے بچنے کے لئے اقدامات کرنا ہوگا۔