نئی دہلی: چیف منسٹر دہلی اروند کجریوال نے قومی دارالحکومت دہلی کے لوگوں سے کورونا کے بڑھتے ہوئے معاملوں کے پیش نظر ماسک پہنے بغیر اپنے گھروں سے باہر نہ نکلنے کی اپیل کی اور ایسا نہ کیے جانے پر بازاروں کو بند کرنے کا انتباہ دیا۔ کجریوال نے نامہ نگاروں سے کہا کہ لوگوں کو بلا وجہ پریشان ہونے کی ضرورت نہیں ہے کیونکہ اب سامنے آنے والے زیادہ تر مریضوں میں خفیف علامات پائی جاتی ہیں تاہم اس کے باوجود چوکنا رہنا ضروری ہے۔ دہلی کی موجودہ صورتحال کے بارے میں انہوں نے کہا کہ زیادہ تر مریضوں کو ہاسپٹل جانے کی ضرورت نہیں پڑتی ہے ۔ انہوں نے کہا کہ حکومت دہلی اب کورونا کیخلاف لڑنے کیلئے 10 گنا زیادہ تیار ہے ، لیکن یہ بھی ضروری ہیکہ لوگ جب بھی باہر جائیں، تو وہ ماسک پہنیں۔ انہوں نے بازاروں میں بغیر ماسک کے پہنچنے والے لوگوں کی وائرل ہونے والی تصاویر اور ویڈیوز پر برہمی کا اظہار کیا۔ انہوں نے لوگوں کو خبردار کیا کہ وہ ماسک کے بغیر گھر سے باہر نہ نکلیں اور کہا کہ ایسا نہ کیے جانے کی صورت میں بازار بند کرنا ہوگا۔
