تہران : ایران کے صدر حسن روحانی نے کہا ہے کہ ایران اور امریکہ کے درمیان ٹرمپ کے دور صدارت سے پہلے والے تعلقات کی بحالی کے خواہش مند ہیں۔ انہوں نے ٹی وی پر خطاب میں کہا کہ ایران اور امریکہ کے درمیان ٹرمپ کے دور صدارت سے پہلے والے تعلقات کو بحال کیا جاسکتا ہے۔ ایرانی صدر نے مزید کہا کہ اگر نومنتخب جوبائیڈن تعلقات میں بہتری کیلئے عزم دکھاتے ہیں تو ہم بھی پیچھے نہیں ہٹیں گے۔ دونوں ممالک 20 جنوری 2017ء کے تعلقات پر واپس جاسکتے ہیں۔ نومنتخب امریکی صدر جوبائیڈن بھی انتخابی مہم کے دوران ایران سے مسائل کے حل کا اشارہ دے چکے ہیں جبکہ 2018ء میں صدر ٹرمپ کے عالمی نیوکلیئر معاہدے سے علیحدگی کے عمل کی بھی مذمت کی تھی۔ جوبائیڈن نے اپنی کابینہ کے اکثریتی رکن وہ منتخب کئے ہیں جو خارجہ پالیسیوں کا وسیع تجربہ رکھتے ہیں۔ وزیر خارجہ کیلئے انٹونی بلنکن کو منتخب کیا ہے جو صدر ٹرمپ کی خارجہ پالیسیوں کے سخت ناقد کے طور جانے جاتے ہیں۔ علاوہ ازیں جوبائیڈن کی کابینہ میں جان کیری بطور ماحولیات کے ایلچی کے طور پر شامل ہیں اور کابینہ اجلاسوں میں بھی شرکت کرسکیں گے۔ جان کیری سابق وزیر خارجہ بھی رہے ہیں۔
