مالے: مالدیپ میں صدر محمد معیزو پر کالا جادو کرنے کے الزام میں وزیر مملکت ماحولیات فاطمہ شمناز سلیم اور ان کے سابق شوہر آدم رمیز کو گرفتار کرلیا گیا۔مقامی میڈیا کے مطابق شمناز سلیم کے سابق شوہر آدم رمیز بھی وزیر کے عہدہ پر فائز تھے اور دونوں کو گزشتہ روز ہی عہدوں سے برطرف کیا گیا تھا اور آج ان کی گرفتاری ظاہر کر دی گئی۔پولیس ذرائع نے میڈیا کو بتایا کہ ماحولیات کی وزیر مملکت شمناز سلیم کو 2 دیگر افراد کے ہمراہ اتوار کو گرفتار کر کے 7 دن کیلئے ریمانڈ پر بھیج دیا گیا تھا۔مالدیپ کے آئین میں کالے جادو کی کوئی سزا متعین نہیں ہے البتہ شرعی قوانین کے تحت کالے جادو پر 6 ماہ قید کی سزا ہوسکتی ہے۔یاد رہے کہ محمد معیزو جب میئر تھے تو شمناز اور رمیز سٹی کونسل کے ممبر تھے اور تینوں کے درمیان دوستانہ تعلقات تھے۔گزشتہ برس نومبر میں معیزو کے صدر بننے پر شمناز کو پہلے صدر کی سرکاری رہائش گاہ ملیاج میں وزیر مملکت اور پھر وزارت ماحولیات منتقل کیا گیا تھا۔مقامی میڈیا کے مطابق شمناز سلیم کے سابق شوہر رمیز 6 ماہ سے زائد عرصہ سے عوامی منظر نامے سے غائب ہیں اور اپنے ساتھی محمد معیزو کے صدر بننے کے بعد سے مکمل خاموش ہیں۔مالدیپ کی حکومت اور صدارتی دفتر نے ابھی تک اس معاملے پر کوئی بیان نہیں دیاجبکہ پولیس نے دونوں وزرا کی گرفتاری میں کالے جادو کے عنصر کی تردید یا تصدیق کرنے سے گریز کیا۔
