بماکو۔8؍نومبر ( ایجنسیز )مغربی افریقی ملک مالی میں پانچ ہندوستانی شہریوں کو مسلح افراد نے اغوا کر لیا ہے تاہم کسی بھی گروپ نے تاحال اس کی ذمہ داری قبول نہیں کی۔ میڈیاکے مطابق ہندوستانی شہری مالی میں ایک کمپنی کیلئے کام کرتے ہیں۔سکیورٹی ذرائع اور کمپنی نے تصدیق کی ہے کہ مالی کے جنوب مغرب میں واقع کوبری نامی گاؤں کے قریب مسلح افراد نے پانچ ہندوستانی شہریوں کا اغوا کیا ہے۔کمپنی کے نمائندے نے میڈیا کو بتایا کہ ادارے کیلئے کام کرنے والے دیگر ہندوستانی شہریوں کوعلاقے سے نکال کر دارالحکومت بماکو پہنچا دیا گیا ہے۔خیال رہے کہ مالی کی فوجی حکومت کو بڑھتی ہوئی بدامنی کو روکنے میں مشکلات کا سامنا ہے جس کا ذمہ دار جرائم پیشہ گروہوں اور القاعدہ اور داعش گروپ سے منسلک عسکریت پسندوں کو ٹھہرایا جاتا ہے۔سکیورٹی کی صورتحال نے مالی جیسے غریب ملک میں معاشی بحران کو طول دیا ہے جہاں القاعدہ سے منسلک گروپ ’سپورٹ آف اسلام اینڈ مسلمز‘ نے ایندھن کی ناکہ بندی کر رکھی ہے۔2012 سے بغاوتوں اور تنازعات کا شکار ملک میں غیر ملکیوں کے اغوا کے واقعات عام ہیں۔سپورٹ آف اسلام اینڈ مسلمز کے عسکریت پسندوں نے ستمبر میں بماکو کے قریب دو اماراتی شہریوں اور ایک ایرانی کو اغوا کیا تھا۔ذرائع کے مطابق مغویوں کو گزشتہ ہفتہ کم از کم پانچ کروڑ ڈالر کے تاوان کی ادائیگی پر رہا کیا گیا تھا۔
