قدرتی آفات سے نمٹنے کیلئے فطرت کا تحفظ بڑا ہتھیار ‘ وزیر اعظم کی من کی بات
نئی دہلی: وزیر اعظم نریندر مودی نے قدرتی آفات سے نمٹنے کیلئے فطرت کے تحفظ کو ایک بڑا ہتھیار قرار دیتے ہوئے عوام سے اپیل کی ہے کہ وہ چھترپتی شیواجی کے آبی انتظام سے تحریک لے کر آنے والے مانسون میں چھوٹے اور بڑے دریاؤں، نہروں اور جھیلوں کو بحال کرنے کے لیے آگے آئیں۔ آل انڈیا ریڈیو پر اپنے ماہانہ پروگرام ’من کی بات‘ کے 102 ویں ایڈیشن میں، مودی نے گجرات کے کچ میں سمندری طوفان بپرجوئے اور اس سے ہونے والے نقصانات کا ذکر کرتے ہوئے اس اعتماد کا اظہار کیا کہ کچھ کے لوگ اپنے مضبوط حوصلے سے اس نقصان پر قابو پالیں گے۔انہوں نے کہا کہ ہم نے دو تین دن پہلے دیکھا کہ ملک کے مغربی سرے پر کتنا بڑا سمندری طوفان آیا جس میں تیز ہوائیں چلیں، تیز بارش ہوئی۔ سمندری طوفان بپرجوئے نے کچھ میں تباہی مچا دی ہے، لیکن جس ہمت اور تیاری کے ساتھ کچ کے لوگوں نے اس خطرناک طوفان کا سامنا کیا وہ اتنا ہی بے مثال ہے۔ کچ جس کے بارے میں کہا جاتا تھا کہ دو دہائیوں پہلے آنے والے تباہ کن زلزلے کے بعد وہ کبھی بھی ابھر نہیں پائے گا، آج وہی ضلع ملک کے تیزی سے ترقی کرنے والے اضلاع میں سے ایک ہے۔ مجھے یقین ہے کہ کچھ کے لوگ سمندری طوفان بپرجوئے سے ہونے والی تباہی سے زیادہ تیزی سے ابھریں گے۔
