برلن۔ انٹر میلان نے نیکولو بریلا اور روملو لوکاکو کے ذریعے پہلے ہاف میں کئے گئے گول کی بدولت لیور کیوزون کو شکست دے کر یوئیفا یوروپا لیگ کے سیمی فائنل میں اپنی جگہ یقینی کرلی جبکہ کوپن ہیگن کے خلاف مانچسٹر یونائیٹڈ نے برونو فرنینڈس کے گول سے جیت کے بعد سیمی فائنل میں داخلہ حاصل کیا ۔اس طرح مانچسٹر یونائیٹڈ اور انٹر میلان کی ٹیمیں یورپا فٹ بال کپ کے سیمی فائنل میں پہنچ گئیں جبکہ کوپن ہیگن اور بایر لیور کوزن کی ٹیمیں کوارٹر فائنل راؤنڈ میں شکست کے بعدخطابی دوڑ سے باہر ہوگئیں۔ یورپا فٹ بال کپ کا49 واں ایڈیشن جاری ہے جس میں کانٹے دار مقابلوں کا سلسلہ اپنے عروج کو پہنچ چکا ہے ۔جرمنی میں کے رائن اینرجی اسٹیڈین اسٹیڈیم، کولون میں کھیلے گئے یورپا فٹ بال کپ کے پہلے کوارٹر فائنل میچ میں مانچسٹر یونائیٹڈ اور انٹر میلان کی ٹیمیں آمنے سامنے تھیں جس میں دونوں ٹیموں کے درمیان انتہائی سخت اورکانٹے دار مقابلہ دیکھنے کو ملا۔دونوں ٹیموں نے ایک دوسرے کے گول پوسٹ پر تابڑ توڑ حملے کئے تاہم دونوں ٹیموں کے درمیان پہلا ہاف بغیر کسی گول کے برابر رہا۔اس کے بعد کھیل ختم ہونے تک بھی کوئی ٹیم گول کرنے میں ناکام رہی جس پر دونوں ٹیموں کو اضافی وقت دیا گیا جس پر مانچسٹر یونائیٹڈ کے برونو فرنینڈز نے95 منٹ میں گول کر کے اپنی ٹیم کی فتح میں اہم کردار اداکیا۔ دوسرے کوارٹر فائنل میچ میں انٹرمیلان کی ٹیم نے سخت مقابلے کے بعد بایر لیور کوزن کو 1-2 گول سے شکست دیکر ٹورنمنٹ کا سیمی فائنل میچ کھیلنے کا اعزاز حاصل کرلیا۔ فاتح ٹیم کی طرف سے بریلا اور لوکاکو نے فی کس ایک گول کر کے اپنی ٹیم کی کامیابی میں اہم کردار اداکیا۔ بایر لیورکوزن کی طرف سے واحد گول ہورٹز نے اسکور کیا۔ واضح رہے کہ ٹورنمنٹ پہلا سیمی فائنل 16 اگست جبکہ دوسرا سیمی فائنل میچ17 اگست کو کھیلا جائے گا۔ ٹورنمنٹ کے فاتح کا فیصلہ 21 اگست کو ہوگا۔
