تقریباً 400 ماوسٹوں نے سہ رخی حملہ کیا، نائب صدرجمہوریہ کا خراج عقیدت
بیجا پور: چھتیس گڑھ کے بیجا پور ضلع میں پولیس اور ماؤ نوازوں کے مابین سنیچر کے روز تقریباً چار گھنٹے تک جاری رہے تصادم میں ایک دن بعد آج دن میں شہید ہونے والے جوانوں کی تعداد پانچ سے بڑھ کر 24 ہوگئی ہے اور مزید 31 جوان زخمی ہیں۔ پولیس ذرائع نے تصادم کے بعد آج موصولہ اطلاعات کے حولاے سے کہا کہ 24 جوانوں کے شہید اور 31 کے زخمی ہونے کی تصدیق ہوئی ہے ، جن میں سے تقریباً ایک درجن کو علاج کے لئے راجدھانی رائے پور بھیج دیا گیا ہے ۔ باقی کا یہاں کے اسپتال میں علاج چل رہا ہے ۔ زخمی جوانوں میں سے کچھ کی حالت کافی سنگین ہے ۔ پولیس کا خیال ہے کہ اس تصادم میں کچھ ماؤ نواز بھی ہلاک ہوئے ہیں، جن کی لاشیں ماؤ نوازوں کے قبضے میں ہی ہیں۔موصولہ اطلاعات کے مطابق جنگل میں پہاڑیوں سے گھرے علاقے میں سینکڑوں کی تعداد میں ماؤنوازوں نے مشترکہ گشتی ٹیم پر حملہ کیا۔ گشتی ٹیم میں بھی سینکڑوں جوان شامل تھے ۔ بتایا گیا ہے کہ ماؤ نواز پہاڑیوں پر سے حملہ کررہے تھے ۔ اس دوران آج اور زیادہ تعداد میں پولیس دستہ جائے واقعہ کی جانب روانہ کیا گیا ہے ۔ذرائع کا کہنا ہے کہ تصادم کا مقام یہاں سے تقریباً 75 کلو میٹر دور ہے تصادم کل دن میں تقریباً دو بجے شروع ہوا تھا اور دیر شام تک جاری رہا ۔
پہاڑیوں سے گھرے علاقے میں کل دیر رات تک پانچ جوانوں کے شہید ہونے کی سینئر افسر نے تصدیق کی تھی۔ زخمیوں میں سے 12 جوانوں کو کل دیر شام ہی ہیلی کاپٹر سے رائے پور بھیج دیا گیا تھا۔پولیس کا کہنا ہے کہ یہ تصادم بیجا پور اور سکما ضلع کی سرحد پر ترریم علاقے کے جنگلوں میں ہوا۔ بتایا گیا ہے کہ یہاں پر کچھ دنوں سے ماؤنوازوں اور ان کے لیڈروں کے یکجا ہونے کی اطلاع پر گشتی ٹیم بھیجی گئی تھی۔ گشتی ٹیم میں سیکڑوں جوان شامل تھے۔ اسی دوران نائب صدر جمہوریہ ہند ایم وینکیا نائیڈو نے چھتیس گڑھ میں ماؤ نوازوں کے حملے میں شہدی ہوئے جوانوں کو خراج عقیدت پیش کیا ہے ۔مسٹر نائیڈو نے اتوار کو یہاں جاری ایک پیغام میں کہا کہ وہ حملے میں زخمی جوانوں کی جلد صحت یابی کی تمنا کرتے ہیں۔نائب صدر نے کہا ‘‘میں چھتیس گڑھ میں ماؤنواز مخالف مہم میں شہید ہوئے حفاظتی دستوں کے جوانوں کو خراج عقیدت پیش کرتا ہوں اور اس مہم میں زخمی جوانوں کی جلد صحتیابی کے لئے دعا گو ہوں۔ میں فوجیوں کے اہل خانہ سے دلی تعزیت کا اظہار کرتا ہوں۔