چومحلہ پیالیس میں سٹی پولیس کی دعوت افطار ۔ ریاستی وزراء اور اعلی عہدیدران پولیس کی شرکت
حیدرآباد 5 مارچ (سیاست نیوز) حیدرآباد پولیس کمشنر کی جانب سے چو محلہ پیالیس میں دعوت افطار کا اہتمام کیا گیا ۔ اس موقع پر ریاستی وزراء ، پولیس عہدیدار ، علماء و مشائخین اور عوام نے شرکت کی ۔ اس موقع پر وزیر اقلیتی بہبود محمد اظہر الدین نے یہ پیام دیا کہ حیدرآباد متنوع ثقافتوں کا گڑھ ہے جہاں زندگی کے ہر شعبے سے تعلق رکھنے والے لوگ ہم آہنگی سے رہتے ہیں۔ انہوں نے کہا کہ ریاستی حکومت اقلیتوں کی فلاح و بہبود اور قانون نافذ کرنے پر عزم ہے ۔ اس موقع پر ریاستی وزیر پونم پربھاکر نے اپنے خطاب میں کہا کہ مسلم بھائیوں کی طرف سے رمضان کے مقدس مہینے میں ادا کی جانے والی نمازوں کیلئے ان کی عقیدت و لگن کی تعریف کی، یہ نوٹ کرتے ہوئے کہ یہ مہینہ معاشرہ میں بھائی چارہ کا مضبوط احساس پیدا کرتا ہے انہوں نے شہر کی منفرد مسلم ثقافت کی تعریف کی اور کہا کہ حیدرآباد کی مذہبی ہم آہنگی دوسرے شہروں کیلئے ایک مثال ہے۔ اس موقع پر ڈائرکٹر جنرل پولیس بی شیودھر ریڈی نے کہا کہ ہر سال حیدرآباد پولیس بڑے اہتمام سے افطار کی دعوت دیتی ہے ۔ اس سے ہم حیدرآباد کی تہذیب اور روایات کی حفاظت کرتے ہیں ۔ اس محنت کیلئے سٹی پولیس کمشنر ، ڈپٹی کمشنران اور عملہ کا بھی شکریہ ادا کرتے ہیں جو شہر میں امن رکھتے ہیں۔ انہوں نے کہا کہ حیدرآباد کے شہریوں کی بہتر خدمت کیلئے تلنگانہ حکومت نے تاریخی شہر حیدرآباد کے مشہور علاقوں جو تاریخی شہر کی روح ہے، جیسے چارمینار ، سکندرآباد ، خیریت آباد ، جوبلی ہلز ، گولکنڈہ ، شمس آباد اور راجندر نگر کے ناموں سے منسوب کرکے نئے زونس قائم کئے۔ رمضان المبارک کی مبارکباد پیش کرتے ہوئے انہوں نے کہا کہ یہ مقدس مہینہ حیدرآباد میں ہر طرف خوشیاں لاتا ہے۔ کمشنر پولیس وی سی سجنار نے بھی عوام کو رمضان المبارک کے مقدس مہینہ کی مبارکباد پیش کی اور عیدالفطر کو جوش و خروش اور پرامن انداز میں گزارنے کا مشورہ دیا۔ اس دعوت افطار کے موقع پر امیر جامعہ حضرت مولانا مفتی خلیل احمد جامعہ نظامیہ نے دعا کی۔ اس تقریب میں حج ہاؤز کے امام ڈاکٹر حافظ محمد صابر پاشاہ قادری ، مولانا سید آل مصطفی قادری علی پاشاہ ، مولانا نعمت اللہ حسینی قادری ، مولانا سید احمد الحسینی ، مولانا سید نوری شاہ ثانی (بنڈلہ گوڑہ) ، مولانا سید فریدالدین زاہد کلیمی، مولانا سید تقی رضا عابدی ، مولانا سید وحیدالدین جعفری ، مولانا سیف اللہ حسینی باقری (سیف پاشاہ) ، جناب تفسیر اقبال ایڈیشنل کمشنر لااینڈ آرڈر حیدرآباد سٹی کے علاوہ سنٹرل پیس کمیٹی رکن سید اعجاز قادری اور دیگر نے شرکت کی۔ب
