ایس پی کو ہرانے بی جے پی کی بھی حمایت کا اشارہ
لکھنؤ: بہوجن سماج پارٹی(بی ایس پی)سربراہ مایاوتی نے بغاوت کرنے والے 7اراکین اسمبلی کو آج پارٹی سے معطل کردیااور یہ بھی کہا کہ گذشتہ سال لوک سبھا انتخابات میں وزیر اعظم نریندر مودی کی قیادت والے این ڈی اے کو روکنے کیلئے سماج وادی پارٹی سے اتحاد کرنا ان کی سیاسی بھول تھی۔ایس پی کا اصلی چہرہ اب سامنے آگیا ہے ۔مایاوتی نے بھنگا کے اسلم رائینی،ڈھولانا کے اسلم علی، پرتاپ پور کے مجتبیٰ صدیق،ہنڈیا کے حاکم لال بند،سدھولی کے ہرگوند بھارگو، منگرا بادشاہ پور کے سشما پٹیل اور سگڑی کی وندنا سنگھ کو معطل کردیا ہے۔انہوں نے اکھلیش یادو پر سخت تنقید کرتے ہوئے کہا کہ راجیہ سبھا انتخابات میں پارٹی ایس پی امیدوار کو ہرانے کی ہر ممکن کوشش کرے گی اور ضرورت پڑی تو بی جے پی کا بھی ساتھ دے گی۔ مایاوتی نے آج اپنے ٹوئٹ میں کہا کہ ہماری پارٹی نے لوک سبھا انتخاب کے دوران فرقہ وارانہ طاقتوں سے لڑنے کیلئے ایس پی سے ہاتھ ملایا تھا لیکن ان کے خاندانی تنازاعات کی وجہ سے بی ایس پی کیساتھ اتحاد زیادہ فائدہ نہیں اٹھا پائے ۔