لکھنؤ، 26 جنوری (یو این آئی) 77ویں یومِ جمہوریہ کے موقع پر بہوجن سماج پارٹی (بی ایس پی) کی صدر مایاوتی نے ملک کے عوام اور دنیا بھر میں مقیم ہندوستانیوں کو مبارکباد پیش کرتے ہوئے حکومتوں پر زور دیا کہ وہ آئین کے تحت ملک کی ترقی کا ایمانداری سے جائزہ لیں۔ پیر کے روز سوشل میڈیا پلیٹ فارم ایکس پر جاری بیان میں مایاوتی نے کہا کہ محض آئین پر فخر کرنا کافی نہیں، جب تک مرکزی اور ریاستی حکومتیں سنجیدگی سے یہ جائزہ نہ لیں کہ آیا ان کے دعوے اور وعدے عوام کے لیے حقیقی سیاسی، سماجی اور معاشی جمہوریت میں تبدیل ہو رہے ہیں یا نہیں۔ انہوں نے زور دیا کہ آئین کی اصل روح شہریوں، بالخصوص غریبوں، استحصال زدہ اور معاشرے کے پسماندہ طبقات کے معیار زندگی کو بہتر بنانے میں پنہاں ہے ۔ مایاوتی نے حکومتوں کی جانب سے دی جانے والی ‘دھوکہ دہی پر مبنی یقین دہانیوں’ کے خلاف متنبہ کرتے ہوئے کہا کہ آئین کے فلاحی مقصد سے ہم آہنگ بامعنی ترقی ہی ملک کے سنگین مسائل کے حل کے لیے ناگزیر ہے ۔ بی ایس پی سربراہ نے یومِ جمہوریہ کے موقع پر پدم وبھوشن، پدم بھوشن، پدم شری اور ملک کے اعلیٰ ترین بہادری کے اعزازات حاصل کرنے والوں کو مبارکباد پیش کی اور ان کے ساتھ ان کے اہلِ خانہ کے لیے نیک تمناؤں کا اظہار کیا۔ اپنی پارٹی کے دیرینہ مطالبے کو دہراتے ہوئے ، مایاوتی نے ایک بار پھر بی ایس پی کے بانی کانشی رام کو ‘بھارت رتن’ دینے کا مطالبہ کیا۔ انہوں نے کہا کہ کانشی رام نے اپنی پوری زندگی کروڑوں غریب، مظلوم اور ‘بہوجن سماج’ کے نظر انداز کیے گئے لوگوں کو بااختیار بنانے کے لیے وقف کر دی تاکہ وہ عزت اور وقار کے ساتھ زندگی گزار سکیں۔ مایاوتی نے مزید کہا کہ انہیں بلا تاخیر ملک کا اعلیٰ ترین شہری اعزاز دینا بالکل برحق ہوگا اور بی ایس پی مسلسل یہ مطالبہ کرتی رہی ہے ۔
