نئی دہلی۔26 نومبر ( سیاست ڈاٹ کام ) طویل عرصہ سے اپنی ناقص کارکردگی کے سبب تنقید کا سامنا کررہے ویسٹ انڈیز کے جارحانہ اوپنر کرس گیل کا آخرکار درد سامنے آہی گیا۔ انہوں نے اپنے دل میں دبی ہوئی بات کوکہہ کرجنوبی افریقہ میں کھیلی جارہی مجانسی ٹی 20 لیگ سے دستبرداری اخیتارکرلی ہے۔ گیل مجانسی سوپرلیگ میں جوجی اسٹارس کی طرف سے کھیلتے ہیں اورگزشتہ چمپئن نے ابھی تک 6 مقابلے کھیلے ہیں اورابھی تک اپناکھاتہ بھی نہیں کھول پائی۔ کرس گیل نے کہا کہ انہیں شکست کا ذمہ دارنہ ٹھہرایا جائے۔ ای ایس پی این سے بات کرتے ہوئے انہوں نے اپنے درد کوسب کے سامنے رکھتے ہوئے کہا کہ ٹی 20 لیگ میں ان کے ساتھ اچھا برتاؤ نہیں کیا جاتا اوروہ اس سے مایوس ہیں۔ کرس گیل نے کہا کہ ان کوسبھی لیگ میں وہ عزت نہیں مل پاتی ہے، جس کے وہ حقدارہیں۔ 40 سالہ اوپنر کرس گیل نے اس لیگ میں 6 اننگز میں صرف 101 رن بنائے اوراسی کے ساتھ ٹورنمنٹ کوالوداع کہہ دیا۔ اتوارکوانہوں نے ٹورنمنٹ کا آخری مقابلہ کھیلا تھا، جس میں انہوں نے 54 رنز کی شانداراننگز کھیلی تھی، جواس ٹورنمنٹ میں ان کی آخری اننگزرہی۔انہوں نے کہا کہ جب ایک یا دومیچ میں ان کے بیٹ سے رنز نہیں نکلتے تواچانک ہی وہ ٹیم کے لئے بوجھ بن جاتے ہیں۔ کرس گیل نے یہ بھی واضح کردیا ہے کہ اس بات کووہ کسی ایک ٹیم کے لئے نہیں کہہ رہے ہیں، بلکہ گزشتہ کافی وقت سے کئی فرنچائز کے ساتھ کھیلنے کی بنیاد پرکہہ رہے ہیں۔ انہوں نے کہا کہ اگردو تین میچ میں رنز نہیں پاتے ہیں تو کہا جاتا ہے کہ کرس گیل بوجھ ہیں۔ ایسا محسوس ہوتا ہے جیسے ایک کھلاڑی ہی پوری ٹیم کے لئے بوجھ بن گیا اوراگرایک بارایسا ہوجاتا ہے توپھر اس کے بعد کئی طرح کی باتیں سنتے ہیں۔ انہوں نے کہا کہ آپ نے کیا کیا ہے، لوگ وہ بھول جاتے ہیں۔یاد رہے گیل ویسٹ انڈیز ٹیم میں بھی اپنی جگہ برقرار رکھنے میں ان دنوں ناکام ہے۔
