تعطیلات کے پیش نظر ڈسمبر اور جنوری میں آبائی مقامات روانگی، دبئی ، دوحہ اور لندن کے مسافرین کو مشکلات
حیدرآباد ۔ 20۔نومبر (سیاست نیوز) متحدہ عرب امارات میں اسکولوں کو تعطیلات اور خلیج میں کارپوریٹ کمپنیوں کی جانب سے تقریباً تین ہفتوں کی چھٹیوں کے اعلان کے بعد خلیجی ممالک سے حیدرآباد کے فضائی کرایوں میں غیر معمولی اضافہ ہوچکا ہے ۔ متحدہ عرب امارات حکومت نے 8 ڈسمبر تا 4 جنوری سرمائی تعطیلات کا اعلان کیا جبکہ خلیج کی بعض کارپوریٹ کمپنیوں نے 2 تا 3 ہفتوں کی تعطیلات دی ہے ۔ تعطیلات کے اعلان کے ساتھ ہی چھٹیاں منانے کیلئے حیدرآباد آنے والے مسافرین کی تعداد میں اضافہ ہوچکا ہے۔ ڈائرکٹوریٹ جنرل آف سیول ایویئشن نے ایرلائینس کمپنیوں کو واضح طور پر ہدایت دی ہے کہ فیسٹول اور تعطیلات کے سیزن میں فضائی کرایوں میں اضافہ نہ کیا جائے۔ ہدایات کے باوجود ایرلائینس کمپنیوں نے مسافرین کی تعداد میں اضافہ کو دیکھتے ہوئے کرایوں میں غیر معمولی اضافہ کر دیا ہے ۔ دبئی سے حیدرآباد کا کرایہ عام حالات میں 8 تا 25 ہزار روپئے ہوتا ہے لیکن تعطیلات کے سبب اسے بڑھاکر 16 تا 60 ہزار کردیا گیا ہے ۔ ڈسمبر کے پہلے اور دوسرے ہفتہ میں ٹکٹ کی بکنگ پر یہ کرایہ وصول کیا جارہا ہے ۔ ابوظہبی ، شارجہ ، دوحہ ، مسقط اور خلیج کے دیگر بڑے شہروں سے بھی سالانہ چھٹیوں پر آنے والے افراد کو زائد کرایہ ادا کرنے پر مجبور ہونا پڑ رہا ہے ۔ جنوری میں واپسی کے کرایہ میں بھی اضافہ کردیا گیا اور عام طور پر سال نو کے موقع پر ایرلائینس کمپنیاں اس مدت میں کرایہ میں اضافہ کرتی ہیں۔ حیدرآباد سے شارجہ کا کرایہ عام حالات میں 10,000 روپئے ہے لیکن جنوری کے پہلے اور دوسرے ہفتہ میں 20,000 روپئے کرایہ وصول کیا جارہا ہے ۔ مغربی ایشیاء عام طور پر حیدرآبادی مسافرین کیلئے اہم راہداری ہے جس میں روزانہ تقریباً 5000 مسافرین سفر کرتے ہیں۔ دبئی میں خدمات انجام دینے والے ملازمین کا کہنا ہے کہ وہ ڈسمبر کے دوسرے ہفتہ میں حیدرآباد جانے کا ارادہ رکھتے ہیں لیکن رات 9 بجے نکلنے والی فلائیٹ کا کرایہ تقریباً 50,000 روپئے ہے جبکہ عام حالات میں 25,000 روپئے میں ٹکٹ بک کیا جاتا ہے ۔ لندن سے حیدرآباد کا کرایہ نومبر میں 35 تا 45 ہزار روپئے ہے لیکن ڈسمبر میں یہ کرایہ ایک لاکھ 2 ہزار تک پہنچ چکا ہے ۔ مسافرین کا کہنا ہے کہ ایر لائینس کمپنیاں جانتی ہیں کہ تعطیلات اور فیسٹول میں لوگ اپنے آبائی مقام کا سفر کرتے ہیں۔ ایسے میں کرایہ میں اضافہ کے باوجود وہ اضافی رقم ادا کرنے پر مجبور رہیں گے۔ 20 ڈسمبر کو لندن سے حیدرآباد ڈائرکٹ فلائیٹ کا کرایہ 4 لاکھ روپئے مقرر کیا گیا ہے ۔ ٹراویل ایجنٹس کا کہنا ہے کہ متحدہ عرب امارات اور دیگر خلیجی ممالک میں اسکولوں کو تعطیلات اور مغربی ایشیاء میں ڈسمبر میں سالانہ تعطیلات کے نتیجہ میں فضائی کمپنیوں نے کرایہ میں اضافہ کا فیصلہ کیا ہے ۔ متحدہ عرب امارات میں مقیم خاندانوں کے لئے ڈسمبر سفر کا موزوں مہینہ ہے کیونکہ اسی مہینہ میں اسکولوں کے علاوہ کارپوریٹ اداروں کو بھی تعطیلات دی جاتی ہے۔ سال نو اور کرسمس کے سلسلہ میں یوروپ سے آبائی مقامات کو روانہ ہونے والے افراد کو تھائی لینڈ ، سنگا پور اور ملایشیا کے ٹکٹ میں اضافہ کا سامنا ہے ۔ ایرلائینس کے کرایہ میں اضافہ پر قابو پانے اور کنٹرول کیلئے ڈائرکٹوریٹ جنرل آف سیول ایویئشن کو متحرک ہونے کی ضرورت ہے۔1
