نئی دہلی ۔30 نومبر (سیاست ڈاٹ کام )کرناٹک پریمیئر لیگ ( کے پی ایل) میں اسپاٹ فکسنگ کے الزامات سے گھرے ابھیمنیو متھن نے گھریلو ٹورنمنٹ سید مشتاق علی ٹرافی ٹوئنٹی 20 ٹورنمنٹ میں ہریانہ کے خلاف چھ گیندوں پر پانچ وکٹ لینے کا انوکھا ٹی 20 ریکارڈ بنایا۔ متھن اس وقت بہترین فارم میں ہیں اورگذشتہ ماہ انہوں نے وجے ہزارے ٹرافی فائنل میں تمل ناڈو کے خلاف کرناٹک کے لئے لسٹ اے کرکٹ میں ہیٹ ٹرک اور پہلی بار اننگز میں پانچ وکٹ کی کامیابی اپنے نام کی تھی۔ اپنے سیزن کو یادگار بناتے ہوئے متھن نے ہریانہ کے خلاف مشتاق علی کے سیمی فائنل مقابلے میں کرناٹک کی فتح میں اہم کردار ادا کرتے ہوئے اسے آٹھ وکٹ سے جیت دلا دی۔ متھن نے اس میچ میں ہیٹ ٹرک سمیت کل پانچ وکٹ نکالے۔ انہوں نے آخری اوورکی چھ گیندوں پرکل پانچ وکٹ لئے اور ٹوئنٹی20 تاریخ میں یہ ریکارڈ بنانے والے واحد کھلاڑی بھی بن گئے۔ متھن نے تیسرے اوور تک 18 رن دیئے اور چوتھے اوور میں مکمل پانسہ پلٹ دیا جس سے ایک وقت تین وکٹ پر 192 رنز بنا چکی ہریانہ کی ٹیم متھن کی بولنگ سے 200 کے ہندسے سے پہلے ہی رک گئی۔ متھن نے آخری اوور کی پہلی گیند پر ہمانشو رانا، دوسری پر راہل تیوتکا، تیسری پر سمیت کمار، چوتھی پر امیت مشرا اور چھٹی گیند پر جینت یادوکو آؤٹ کرنے کے ساتھ ٹی 20 کرکٹ کا نیا ریکارڈ بنا دیا۔ وہ سری لنکا کے لستھ ملنگا کے بعد دوسرے ایسے بولر بن گئے ہیں جس نے ایک ہی اوور میں چارگیندوں پر چار وکٹ ہیں۔ یہ بھی دلچسپ ہے کہ ٹی 20 ریکارڈ بنانے والے متھن کوکرناٹک پریمیئر لیگ میں فکسنگ معاملے میں پوچھ گچھ کے لیے بلایا جائے گا۔ ان سے مرکزی کرائم برانچ پوچھ گچھ کرے گی۔ یاد رہے کہ 29 نومبر 1963 کو رانجی مقابلے میں سرویس کی نمائندگی کرنے والے میڈیم فاسٹ بولر جوگیندر راؤ نے نارتھ پنجاب کے خلاف ایک اننگز میں 2 ہیٹ ٹرک کا کارنامہ انجام دیا تھا ۔اس کے علاوہ پہلے دو مقابلوں میں 3 ہیٹ ٹرک لینے کا ریکارڈ بھی راؤ کے نام ہی درج ہے جس میں کرئیر کا پہلا مقابلہ قابل ذکر ہے۔
