کرائسٹ چرچ۔28 فروری (سیاست ڈاٹ کام ) ہندوستانی ٹسٹ ٹیم کے نائب کپتان اجنکیا رہانے نے کہا ہے کہ ہندوستانی ٹیم ویلنگٹن میں ملی 10 وکٹ کی شرمناک شکست کو پیچھے چھوڑ کر ہفتہ کوکرائسٹ چرچ میں ہونے والے دوسرے اور آخری میچ میں مثبت سوچ کے ساتھ اترے گی تاکہ وہ سیریز میں برابری حاصل کر سکے۔ ہندوستانی ٹیم پہلے ٹسٹ میں چاروں چانے چت رہی تھی اور اسے نیوزی لینڈ کے خلاف تیسری بار دس وکٹ سے شکست کا سامنا کرنا پڑا تھا۔ نیوزی لینڈ نے اس سے پہلے 1989-90 میں کرائسٹ چرچ میں اور2002-03 میں ویلنگٹن میں ہندستان کو 10 وکٹوں سے شکست دی تھی۔ اس میچ میں ہندوستان کی بیٹنگ اور بولنگ دونوں ناکام رہی تھی۔ رہانے نے دوسرے ٹسٹ سے قبل کہا کہ ہندستان نے پہلے میچ کی اپنی غلطیوں کو دور کرنے پر کام کیا ہے اور وہ مثبت سوچ کے ساتھ دوسرے ٹسٹ میں اترے گا۔ انہوں نے کہاکہ ہمارے لئے سب سے زیادہ ضروری ہے کہ ہم یہاں کے حالات کے مطابق خود کو جلد سے جلد ڈھال لیں۔آیگلے اوول کی پچ میں ویلنگٹن کے مقابلے زیادہ تیزی رہے گی اور اس کا ہندوستانی بولروں کو فائدہ مل سکتا ہے۔ نائب کپتان نے کہاکہ نیوزی لینڈ میں بیٹنگ اوربولنگ ایک یونٹ کے طور پر ہمیں حالات سے عادی ہونا ہوگا۔ یہاں کی پچیں ہندستان ، جنوبی افریقہ یا آسٹریلیا کی پچوں سے بالکل مختلف ہیں۔ ہندستان اے ٹیم یہاں کھیل چکی ہے۔ ہنومارہاری نے ہمیں بتایا ہے کہ اس وکٹ پر کافی تیزی اور اچھال ہے۔ ہمیں پہلے دن سے ہی خود کو حالات سے ہم آہنگ کرنا ہوگا اور حالات کے حساب سے کھیلنا ہو گا۔ اس سے بھی زیادہ ضروری چیز یہ ہے کہ ہمیں گزشتہ ٹسٹ کے بارے میں نہ سوچتے ہوئے خود پر اعتماد قائم رکھیں اور ورلڈ ٹسٹ چمپئن شپ میں اپنے کھاتے میں 60 پوائنٹس کا اضافہ کریں۔ہندوستانی ٹیم پہلے ٹسٹ کی دونوں اننگز میں 165 اور 191 رن پر ڈھیر ہوگئی تھی جس کے بعد ہندوستانی بیٹسمینوں کی مشکل وکٹوں میں کھیلنے کی صلاحیت پر سوال اٹھائے جا رہے تھے۔
رہانے نے ویلنگٹن میں مایوس کرنے والے فاسٹ بولروں جسپریت بمراہ اور محمد سمیع کا دفاع کرتے ہوئے کہاکہ پہلے ٹسٹ میں بمراہ اور سمیع دونوں نے ہی ایک ایک وکٹ لئے۔ وہ مسلسل بولنگ کر رہے ہیں۔ ابھی ایک میچ ہوا ہے۔ ایشانت شرما نے بھی اچھی بولنگ کی۔ ہمیں پوری امید ہے کہ اگلے میچ میں سمیع بمراہ اپنی فارم حاصل کرلیں گے۔ اگر ہم اگلے میچ میں بیٹنگ سے آغاز کرتے ہیں تو پہلے ہی دن کے کھیل سے ہمیں اچھا مظاہرہ کرنا پڑے گا تاکہ ہمارے بولروں کے پاس دباوبنانے کے لئے بورڈ پر اچھا ا سکور رہے۔ بمراہ اور سمیع دونوں ہی عالمی معیار کے فاسٹ بولر ہیں۔نائب کپتان نے ساتھ ہی اشارہ دیا کہ ٹیم میں توازن لانے کے لئے کپتان وراٹ کوہلی اور کوچ روی شاستری دوسرے ٹسٹ میں آف اسپنر روی چندرن اشون کی جگہ شاندار فارم میں موجود رویندر جڈیجہ کو موقع دے سکتے ہیں۔