بھوپال: مدھیہ پردیش کے سابق چیف منسٹر اور کانگریس کے سینئر لیڈر کمل ناتھ کے ’’کمل‘‘ کا ساتھ جڑنے کی قیاس آرائیوں کے درمیان کانگریس کے سینئر لیڈر ڈگ وجے سنگھ نے آج کہا کہ انہیں نہیں لگتا کہ کمل ناتھ پارٹی چھوڑیں گے ۔راجیہ سبھا ایم پی سنگھ نے یہاں میڈیا کے سوالات کے جواب میں کہا کہ کمل ناتھ جیسے شخص نے اپنے کیریئر کا آغاز کانگریس سے کیا تھا۔ انہیں مسز اندرا گاندھی کا تیسرا بیٹا سمجھا جاتا تھا۔ انہوں نے ہمیشہ کانگریس کا ساتھ دیا۔ وہ کانگریس کے ایک ستون رہے ۔ مرکزی حکومت میں وزیر رہے۔ تنظیم میں جنرل سکریٹری رہے ۔ ریاستی صدر بنے اور پھر وزیر اعلیٰ بھی بنے ۔ انہیں تمام عہدے مل چکے ہیں۔ سنگھ نے کہا کہ اس لیے انہیں نہیں لگتا کہ وہ کانگریس چھوڑیں گے۔سنگھ نے کہا کہ جس طرح ہر کوئی ای ڈی، آئی ٹی اور سی بی آئی کے دباؤ میں ہے ، یہ ان ( کمل ناتھ) پر بھی ہے لیکن کمل ناتھ کا کردار دباؤ کے سامنے جھکنے والا نہیں رہا۔ اسی سے متعلق ایک سوال کے جواب میں انہوں نے کہا کہ کمل ناتھ کہہ چکے ہیں کہ ’’جوائن نہیں کیا اور استعفیٰ نہیں دیا‘‘۔ پھر مزید کیا وضاحت چاہتے ہیں۔قبل ازیں کل سنگھ نے جبل پور میں کہا تھا کہ انہوں نے خود کمل ناتھ سے بات کی ہے اور کہا کہ وہ کانگریس نہیں چھوڑیں گے ۔دریں اثنا کمل ناتھ کل سے دہلی میں ہیں۔ وہ ہفتہ کی دوپہر چھندواڑہ سے بھوپال کے راستے دہلی پہنچے ہیں۔ سیاسی حلقوں میں قیاس آرائیاں کی جا رہی ہیں کہ کمل ناتھ اپنے حامیوں کے ساتھ کانگریس چھوڑ کر بی جے پی میں شامل ہو سکتے ہیں۔ کمل ناتھ کے کٹر حامی سمجھے جانے والے سابق ریاستی وزیر سجن سنگھ ورما کی سوشل میڈیا ایکس پر ایک پوسٹ موضوع بحث بن گئی ہے ۔