رائے پور: وزیر اعظم نریندر مودی نے کانگریس اور اپوزیشن پارٹیوں کے اتحاد کی کوششوں پر سخت وار کرتے ہوئے کہا کہ… اگر وہ سوچتے ہیں کہ ایسا کرکے وہ مودی کو ڈرا پائیں گے تو انہیں سمجھ لینا چاہئے کہ جو ڈر جائے وہ مودی نہیں ہوتا۔چھتیس گڑھ اسمبلی کے سال کے آخر میں ہونے والے عام انتخابات کے لیے بی جے پی کی وجے سنکلپ ریلی کے ذریعہ مہم کا آغاز کرتے ہوئے مودی نے آج یہاں کہا کہ جو لوگ ایک دوسرے کو پانی پی پی کر کوستے تھے ، وہ ایک ساتھ آنے کی کوشش کررہے ، وہ سوچتے ہیں کہ ایسا کرنے سے وہ مودی کو ڈرا سکیں گے ، ہلا سکیں گے تو ملک کے بدعنوان لوگ کان کھول کر سن لیں، اگر وہ بدعنوانی کی گارنٹی ہیں تو مودی بدعنوانی پر کارروائی کی گارنٹی ہے ۔ انہوں نے کہا کہ جس نے ظلم کیا ہے وہ نہیں بچے گا۔ مجھ میں یہ کہنے کی ہمت ہے کیونکہ میرے پاس صرف وہی ہے جو آپ نے مجھے دیا ہے اس کے سوا کچھ نہیں ہے ۔ انہوں نے کہا کہ یہ میرے پیچھے پڑیں گے ، میری قبر کھودنے کی دھمکی دیں گے ، لیکن انہیں پتہ نہیں ہے جو ڈر جائے وہ مودی نہیں ہوتا۔ تقریباً آدھے گھنٹے کے اپنے خطاب میں مودی نے کانگریس پر شدید حملہ کیا اور اس پر بدعنوانی کی ماں ہونے کا الزام دہرایا۔چھتیس گڑھ کی تعمیر میں بی جے پی کے اہم کردار کو یاد دلاتے ہوئے مودی نے کہا کہ صرف بی جے پی ہی چھتیس گڑھ کے لوگوں کو سمجھتی ہے ، اور اس ریاست کو تیزی سے ترقی دے سکتی ہے ۔
وزیر اعظم نریندر مودی کی رائے پور آمد
رائے پور: وزیر اعظم نریند ر مودی اپنے چھتیس گڑھ کے دورہ پر یہاں پہنچ گئے ۔مودی کچھ سرکاری پروگراموں میں حصہ لینے کے ساتھ ہی راجدھانی میں ایک جلسہ عام سے خطاب کرکے سال کے آخر میں ہونے والے اسمبلی انتخابات کی مہم شروع کریں گے ۔ مودی صبح تقریباً 10.20 بجے رائے پور ہوائی اڈے پر پہنچے ، جہاں بی جے پی کے سینئر لیڈر اور سابق وزیر اعلیٰ ڈاکٹر رمن سنگھ نے ان کا استقبال کیا اور وہاں سے مودی ان کے ساتھ ہیلی کاپٹر کے ذریعہ سائنس کالج گراؤنڈ کے لیے روانہ ہوئے ۔ہیلی پیڈ پر چھتیس گڑھ کے گورنر ن ہری چندن اور وزیر اعلی بھوپیش بگھیل نے ان کا استقبال کیا۔ مودی سب سے پہلے مرکزی حکومت کے کچھ محکموں کی طرف سے منعقدہ پروگراموں میں شرکت کریں گے ۔اس پروگرام میں وہ نیشنل ہائی وے کے پانچ پروجیکٹوں کا افتتاح کریں گے اور سنگ بنیاد رکھیں گے ۔اس کے بعد وہ جلسہ گاہ پہنچیں گے ۔مسٹر مودی وہاں ایک جلسہ عام سے خطاب کریں گے ، پھر گورکھپور سے واپس ہوائی اڈہ کے لیے روانہ ہوں گے ۔ مودی تقریباً چار سال بعد چھتیس گڑھ آئے ہیں، آخری بار انہوں نے لوک سبھا انتخابات کی مہم کے سلسلے میں 2019 میں ریاست کا دورہ کیا تھا۔