چینائی ۔ ویراٹ کوہلی نے مداحوں سے درخواست کی ہے کہ اْنہیں ’کنگ‘ کہہ کر نہ پکارا جائے، اْنہیں اس لقب سے شرمندگی محسوس ہوتی ہے۔ انڈین پریمیئر لیگ کی ٹیم رائل چیلنجرز بنگلور کی جانب سے ٹیم کی نئی جرسی کے حوالے سے تقریب منعقد کی گئی جس میں ویراٹ کوہلی بھی شریک ہوئے۔ کوہلی نے جنوبی اقریقہ کے کھلاڑی فاف ڈوپلیسی کے ساتھ مل کر فرنچائزکی نئی جرسی متعارف کی۔ اس دوران ایم چنا سوامی اسٹیڈیم ویراٹ کوہلی کے مداحوں سے کھچا کھچ بھرا ہوا تھا۔ اسٹیڈیم میں موجود کرکٹ شائقین سے بات کرتے ہوئے کوہلی نے مداحوں پر زور دیتے ہوئے درخواست کی کہ مجھے مزید کنگ کے نام سے نہ پکارا جائے، مجھے صرف ویراٹ کہیں، جب کنگ پکارا جاتا ہے تو مجھے شرمندگی محسوس ہوتی ہے۔ اس دوران ویراٹ کوہلی سے سوال کیا گیا کہ بیٹے کی پیدائش کے بعد دوبارہ کرکٹ کے میدان میں آنے سے متعلق کیسا محسوس کر رہے ہیں؟ تو کوہلی نے کہا کہ میدان میں واپس آنا بہت اچھا لگا ہے۔
