سری نگر:سی پی ایم کے سینئر لیڈر محمد یوسف تاریگامی نے انفورسمنٹ ڈائریکٹوریٹ (ای ڈی) کی طرف سے پی ڈی پی صدر اور سابق وزیر اعلیٰ محبوبہ مفتی کے نام جاری سمن کو سیاسی انتقام قرار دیتے ہوئے کہا ہے کہ مرکزی حکومت سیاسی مخالفین کے خلاف یجنسیوں کو استعمال کرکے ان کی آواز کو دبانا چاہتی ہے ۔انہوں نے کہا کہ بی جے پی قیادت والی مرکزی سرکار کو اپنے مخالفین کو دھمکانے کی پالیسی کو ترک کرنا چاہئے ۔انہوں نے کہا: ‘محبوبہ مفتی کے نام ای ڈی کا سمن بی جے پی سربراہی والی مرکزی سرکار کی طرف سے سیاسی مخالفین کے خلاف ایجنسیوں کے استعمال کرنے کی ایک اور مثال ہے ’۔ان کا کہنا تھا کہ یہ سیاسی انتقام ہے تاکہ اختلاف رائے رکھنے والوں کی آواز کو دبایا جا سکے ۔یہ مرکزی حکومت کی طرف سے دفعہ 370 کو بحال کرنے کیلئے اٹھائی جانے والی آوازوں کو بھی دبانا ہے ۔‘بی جے پی حکومت کو وچ ہنٹنگ اور ڈرانے دھمکانے کی پالیسی سے بر آمد ہونے والے خطرات کو سمجھ لینا چاہئے اور اس پالیسی کو ترک کرنا چاہئے اور اس کی بجائے متعلقین اکیساتھ دفعہ 370 کی بحالی کے حوالے سے بات شروع کرنی چاہئے ۔
