شادی خانہ کی تعمیر کا مقام تبدیل ۔ مقامی مسلمانوں سے مشاورت کرنے وزیر وی سرینواس گوڑ کا اعلان
’ سیاست ‘ کی خبر کا اثر
محبوب نگر : 17 جولائی ( سیاست ڈسٹرکٹ نیوز) مستقر محبوب نگر پر عیدگاہ وقف رحمانیہ کی اراضی پر شادی خانہ کی مجوزہ تعمیر کو منسوخ کرتے ہوئے مقام کو تبدیل کر کے تعمیر کرنے کا ریاستی وزیر آبکاری وی سرینواس گوڑ نے آج اعلان کیا ۔ واضح رہے کہ روزنا مہ سیاست میں وقف رحمانیہ کی اراضی پر شادی خانہ کی تعمیر اور دیگر قبضہ جات سے متعلق خبر شائع ہوئی تھی جس کے بعد مسلمانوں میں بے چینی پیدا ہوگئی تھی ۔ اسی کے پیش نظر اب شادی خانہ کے مقام کو تبدیل کرنے کا فیصلہ کیا گیا ہے ۔ اس سلسلہ میں ایک بیان میں ریاستی وزیر وی سرینواس گوڑ نے کہا کہ عیدگاہ کی اراضی پر مجوزہ شادی خانہ کا جو سنگ بنیاد رکھا گیا تھا اس کا مقصد یہ تھا اس کی تعمیر سے غریب اور پسماندہ مسلمانوں کو کئی ایک سہولتیں دستیا ب ہوسکیں ۔ اس کے علاوہ عیدین کے موقع پر بارش اور دھوپ سے مصلیان محفوظ رہ سکیں لیکن مسلمانان محبوب نگر نے شادی خانہ کے مقام کی تبدیلی کا پُرزور مطالبہ کیا ۔ ہم نے بی آر ایس قائدین کے ساتھ وسیع تر مشاورت کے بعد عیدگاہ کی اراضی پر شادی خانہ کی تعمیر کا فیصلہ منسوخ کردیا ۔ اب پارٹی قائدین اور شہر کے مسلم دانشوروں سے مشاورت کے بعد کسی اور مقام پر شادی خانہ کی تعمیر عمل میں آئے گی ۔ انہوں نے اپنی میعاد میں اقلیتوں کی فلاح کیلئے اقدامات پر کہا کہ شہر کے چاروں سمت مسلم قبرستانوں کیلئے 16 ایکڑ اراضی مختص کی گئی ۔ مسلم اقلیت کیلئے 6رہائشی اسکول ، 6جونیئر کالجس قائم کئے گئے ۔ عنقریب 6ڈگری کالجس قائم ہونگے ۔ اقامتی اسکولس کی تعمیر کیلئے 120 کروڑ کے صرفہ سے تعمیر جاری ہے جبکہ حضرت مردان علی شاہؒ درگاہ ، باگمارشاہ درگاہ اور دیگر مذہبی مقامات کی تعمیر و تزئین کیلئے بھاری قومات جاری کی گئیں ۔ حج ہاؤز کی تعمیر سرکاری اراضی پر ایک کروڑ کے صرفہ سے تعمیر کی جارہی ہے ۔ انہوں نے کہا کہ اقلیتوں کی فلاح کیلئے وہ شبانہ روز مصروف ہیں ۔ وزیر کے ہمراہ خواجہ فیاض الدین انور پاشاہ رکن وقف تحفظ کمیٹی ، عبدالرحمن چیرمین اگریکلچر مارکٹ کمیٹی ، محسن خان ، سلمان شریف نائب صدر جے پی آئی ٹی آئی و دیگر موجود تھے ۔