محبوب نگر ۔ 24 نومبر (سیاست ڈسٹرکٹ نیوز) اقلیتوں بالخصوص مسلمانوں کی فلاح و بہبود صرف بی آر ایس سے ہی ممکن ہے۔ ریاستی وزیر داخلہ محمد محمود علی نے آج نماز جمعہ کے موقع پر چیرمین ریاستی وقف بورڈ محمد مسیح اللہ خان کے ہمراہ مستقر محبوب نگر کی مساجد مسجد شاہ صاحب گٹہ اور مسجد انصار میں مصلیوں سے ملاقات کی۔ انہوں نے بتایا کہ ہمیشہ آپ کے حلقہ کی ترقی کے لئے کوشاں رہنے والے بی آر ایس امیدوار وی سرینواس گوڑ کو اپنا ووٹ دے کر کامیاب بنانے کی ضرورت ہے تاکہ شہر کی ترقی جاری رہ سکے۔ وہ نہ صرف ترقی بلکہ مسائل میں آپ کے ساتھ ہیں۔ ریاستی چیف منسٹر کے سی آر کی قیادت میں بی آر ایس حکومت نے اقلیتوں کی فلاح کے لئے سنجیدہ اور تاریخی اقدامات کئے ہیں۔ ریاستی وزیر داخلہ نے درگاہ حضرت مردان علی شاہ قادری ؒ پر بھی حاضری دی۔ بی آر ایس امیدوار وی سرینواس گوڑ نے بتایا کہ وہ محبوب نگر میں 120 کروڑ کے صرفہ سے اقامتی اسکولس کی تعمیر کروا رہے ہیں جبکہ 6 اقامتی اسکولس اور جونیر کالجس موجود ہیں۔ 6 ڈگری کالجس کا بھی عنقریب آغاز ہوگا۔ محبوب نگر گنگا جمنی تہذیب کا گہوارہ ہے۔ اس کی ترقی جاری رہے گی۔ انہوں نے گمراہ کن پروپگنڈہ میں نہ آنے کی اپیل کی۔ ان کے ہمراہ بی آر ایس قائدین سید ابراہیم، محمد عبدالرحمن چیرمین زرعی مارکٹ کمیٹی بشیر احمد، مرزا جاوید بیگ، محمد مقبول و دیگر قائدین موجود تھے۔
