حیدرآباد: سابق ہندوستانی کپتان محمد اظہرالدین کو حیدرآباد کرکٹ اسوسی ایشن (ایچ سی اے ) کے صدر کی حیثیت سے بحال کردیا گیا ہے ۔ لوک پال جسٹس (ر) دیپک ورما نے ان کے حق میں فیصلہ سناتے ہوئے اظہرالدین کو معطل کرنے والے اپیکس کونسل کے پانچ ممبروں کے خلاف کارروائی کرتے ہوئے انہیں عارضی طور پر نااہل قرار دے دیا ہے۔ ماضی میں قواعد کی خلاف ورزی کرنے پر اظہرالدین کو ان کے عہدے سے برخاست کردیا گیا تھا۔ واضح رہے کہ سابقہ ہندوستانی کپتان کو ستمبر 2019 میں ایچ سی اے کا صدر بنایا گیا تھا۔ ایچ سی اے لوک پال نے ایک عبوری حکم میں ایچ سی اے اپیکس کونسل کے پانچ ممبران نائب صدر کے جان منوج ، آر وجیہ آنند ، نریش شرما ، سریندر اگروال اور انورادھا کو عارضی طور پر نااہل قرار دے دیا ہے ، جن کی جانب سے کونسل کے آئین کے مبینہ خلاف ورزی کاحوالہ دیتے ہوئے اظہرالدین کو معطل کردیا گیاتھا۔لوک پال دیپک نے اپنے حکم میں کہا ہے کہ اظہرالدین کے خلاف شکایت لوک پال کو نہیں بھیجی گئی ہے ، لہٰذا اس کی کوئی حیثیت نہیں ہے ۔ ایپکس کونسل خود ہی اس طرح کے فیصلے نہیں لے سکتی ، لہٰذا اگر کرکٹ اسوسی ایشن کے منتخب صدر کو معطل کرنے کے لئے ان پانچ ممبروں کے ذریعہ کوئی قرارداد منظور ہو گئی ہے تو میں اس کو رد کرنا مناسب سمجھتا ہوں اور شوکاز نوٹس جاری کرکے ایسا کرنا چاہتا ہوں۔ میں ہدایت دیتا ہوں کہ پانچوں ممبران ایچ سی اے کے صدر محمد اظہرالدین کے خلاف کوئی بھی کارروائی کرنے سے باز رہیں۔
