کراچی۔30 مارچ (سیاست ڈاٹ کام ) پاکستان کرکٹ ٹیم کے سابق کپتان اور آل رائونڈر محمد حفیظ نے کہا ہے کہ اس سال اکتوبر نومبر میں ٹی 20ورلڈ کپ میں پاکستان کی نمائندگی کرنا چاہتا ہوں اور اس کے بعد باعزت انداز میں بین الاقوامی کرکٹ کو خیر باد کہہ دوں گا لیکن دنیا بھر میں لیگزکھیلتا رہوں گا۔ کرکٹ سے مکمل کنارہ کش ہونے کے بعد فیصلہ کروں گا۔ دیکھوں گاکہ زندگی کہاں لے جاتی ہے، آیا کوچنگ میں جائوں گا یا کسی اور شعبے میں قسمت آزمائوں گا۔ 17اکتوبر کو محمد حفیظ 40 سال کے ہوجائیں گے۔ وہ ٹسٹ اور ونڈے کرکٹ کو پہلے ہی خیر باد کہہ چکے ہیں۔ ایک انٹر ویو میں محمد حفیظ نے کہا کہ میں عزت اور کامیابیوں کے ساتھ کرکٹ کو الوادع کہنا چاہتا ہوں۔ ابھی میں نے مستقبل کی کوئی منصوبہ بندی نہیں کی ہے۔ سبکدوشی کے بعد مستقبل کے بارے میں کوئی فیصلہ کروں گا۔ میرے پاس انٹر نیشنل کرکٹ چھوڑنے کے بعد نیشنل لیگ کھیلنے کا راستہ موجود ہے۔ میرے جسم اور میری کارکردگی میں کچھ ایسے سال موجود ہیں جنہیں میں کھیل کے میدان میں صرف کرناچاہتا ہوں۔
