دبئی ۔12 فروری (سیاست ڈاٹ کام) پاکستانی کرکٹ ٹیم کے تجربہ کارآل راؤنڈر محمد حفیظ کا بولنگ ایکشن جائز قرار دے دیا گیا ہے اور اب وہ بین الاقوامی مقابلوں میں بولنگ کر سکیں گے۔ ذرائع کے بموجب محمد حفیظ کا بولنگ ایکشن آئی سی سی کی منظور شدہ لاہور کی مقامی یونیورسٹی کی بائیو مکینک لیب میں لیا گیا جس میں ان کے بازو کا خم 15ڈگری کی قانونی حد میں پایا گیا۔ آئی سی سی کی جانب سے حتمی اعلان ہونے کے بعد محمد حفیظ عالمی مقابلوں کے ساتھ ساتھ پاکستان سوپر لیگ(پی ایس ایل) میں بطور آل راؤنڈر بولنگ کر سکیں گے۔ یاد رہے کہ گزشتہ سال دسمبر میں انگلش کرکٹ بورڈ نے آل راؤنڈر محمد حفیظ کے بولنگ ایکشن کو غیر قانونی قرار دیا تھا جس کے سبب وہ انگلش کرکٹ بورڈ کے زیر اہتمام ایونٹس کے ساتھ ساتھ عالمی ایونٹس میں شرکت سے محروم ہو گئے تھے۔ محمد حفیظ کا ایکشن اس سے قبل انٹرنیشنل کرکٹ میں بھی کئی مرتبہ رپورٹ ہو چکا ہے اور انہیں متعدد مرتبہ پابندیوں کا سامنا بھی کرنا پڑا ہے تاہم ہر بار وہ اپنے ایکشن کو کلیئر کروانے میں کامیاب رہے۔