نئی دہلی۔8 جنوری (سیاست ڈاٹ کام ) ہندوستانی فاسٹ بولر محمد سمیع کو سری لنکا کے خلاف اگرچہ رواں ٹوئنٹی 20 سیریز سے آرام دیا گیا ہے لیکن وہ نئے سال کے آئندہ چیلنجوں کے لئے پورے زور شور سے تیاریوں میں لگے ہوئے ہیں۔ ٹیم کے اسٹار بولر نے سوشل ویب سائٹ پر اپنی ٹریننگ کی تصاویر پوسٹ کی ہیں جس میں وہ ورزش کرتے دکھائی دے رہے ہیں۔ سمیع نے اپنی تصویر کے ساتھ لکھاکہ ٹریننگ جاری ہے۔۔۔ نئے سال میں نئے چیلنجوں کے لئے تیاری کر رہا ہوں۔ زبردست فارم میں موجود تجربہ کار فاسٹ بولرکو رواں تین میچوں کی ٹوئنٹی 20 سیریز کے لئے فی الحال آرام دیا گیا ہے۔ سمیع نے سال 2019 میں 20 میچوں میں 42 وکٹیں لیتے ہوئے سال کے دوسرے کامیاب ترین بولر رہے۔ وہ ممبئی میں 14 جنوری کو شروع ہونے والی آسٹریلیا کے خلاف اہم تین ون ڈے میچوں کی سیریز سے ٹیم میں واپسی کریں گے۔سمیع نے گزشتہ سال ورلڈکپ میں افغانستان کے خلاف ہیٹ ٹرک لی تھی اور فی الحال ہندوستانی ٹیم کے سرکردہ فاسٹ بولروں میں شامل ہیں۔