جمعیتہ العلماء ( محمود مدنی گروپ ) کی مکمل تائید اور ان کی کامیابی کیلئے مہم چلانے کا اعلان
نظام آباد :23؍ نومبر (سیاست ڈسٹرکٹ نیوز)جمعیۃ علماء ہند (محمود مدنی گروپ) ریاستی جنرل سکریٹری حافظ پیر خلیق احمد صابر نے نظام آباد حلقہ اسمبلی اربن کانگریس امیدوار رسابقہ ریاستی وزیر محمد علی شبیر کی تائید و حمایت کرتے ہوئے ان کی کامیابی کیلئے منظم انداز میں انتخابی مہم چلانے کا اعلان کردیا۔دفتر جمعیۃ علماء ہند بودھن روڈ نظام آباد میں منعقدہ خصوصی مشاورتی اجلاس میںحافظ پیر خلیق صابر نے مخاطب کرتے ہوئے کہاکہ ریاستی جمعیۃ علماء نے اعلیٰ سطحی اجلاس منعقد کرکے متفقہ طورپر اسمبلی انتخابات میں مسلم امیدواروں کی تائید کرنے کا فیصلہ کیا ہے۔ انہوں نے بتایاکہ جمعیۃ کے 6مطالبات میں مسلمانوں کے مسائل ان کے فوائد اور ان کی سہولتوں اور موجودہ حالات کے پیش نظر کئے جانے والے اقدامات پر مبنی ہے جس کو سیکولر کانگریس پارٹی نے مسلمانوں کے مطالبات پر مبنی جمعیۃ کے انتخابی منشور کو قبول و منظور کیا۔ حافظ پیر خلیق صابر نے کہاکہ ملک و ریاست میں گذشتہ 70سالوں سے ملک و ریاست تلنگانہ میں فرقہ پرستوں سے اتحاد نہ کرنے والی پارٹی کانگریس کی تائید کرنے کا فیصلہ کیا گیا ہے۔ کانگریس کے دور میں بہترین کارکردگی کا بھی جائزہ لیا گیا جس کے پیش نظر کانگریس پارٹی میں قوم کی طرف سے نمایاں چہرہ محمد علی شبیر کا ہی نظر آیا۔ جمعیۃ علماء کبھی بھی سیکولر پارٹی کا ساتھ نہیں چھوڑا اور کبھی بھی اقتدار حاصل کرنے کیلئے کسی فرقہ پرست جماعت کی تائید نہیں کی۔ جمعیت کی نظریں مرکزی حکومت پر ہے جو ان کا مقابلہ کرسکے۔ انہوں نے کہاکہ آزمانے والے کو نہ آزمایا جائے کہ مصداق 10سالوں سے ریاست تلنگانہ حکومت نے مسلمانوں کو یکسر نظر انداز کردیا گیا ۔ انہوں نے کہاکہ لڑائی کے دوران جو ہمارے ساتھ کھڑا ہے ہم اس کے ساتھ کھڑے رہیں گے۔ ریاستی جنرل سکریٹری حافظ خلیق صابر نے نظام آباد کی عوام بالخصوص مسلمانوں سے کہاکہ کانگریس کے امیدوار محمد علی شبیر جیسی شخصیت کو بھاری ووٹوں کی اکثریت سے کامیابی سے ہمکنار کرنا ان کی ذمہ داری ہے۔ اس موقع پر کانگریس نظام آباد امیدوار محمد علی شبیر نے کہاکہ جمعیۃ علماء کے مسلمانوں کے مفادات پرمبنی مطالبات کو کانگریس پارٹی نے اپنے منشور میں شامل کیا ہے۔ اس طرح کانگریس کا یہ انتخابی منشور جمعیۃ علماء کا بھی کہاجاسکتا ہے۔ مولانا معراج الدین ابرار چشتی صدر صدائے اردو سوسائٹی مرزا افضل بیگ تیجان نے بھی مخاطب کرتے ہوئے ووٹ کی اہمیت اور کثیر تعداد میں ووٹ کا استعمال کرنے کی ضرورت پر زور دیا۔ اس اجلاس میں نظام آباد کانگریس امیدوار سابقہ ریاستی وزیر محمد علی شبیر، مولانا معراج الدین ابرار چشتی، پی سی سی نائب صدر طاہر بن حمدان، جنرل سکریٹری گڑگو گنگادھر، صدر ضلع جمعیۃ علماء سید سمیع اللہ، سٹی صدر کانگریس کیشو وینو، صدر صدائے اردو سوسائٹی و جنرل سکریٹری سینئر سٹیزن مرزا افضل بیگ تیجان کے علاوہ جمعیۃ علماء کے ذمہ داران اور دیگر کانگریس قائدین نے شرکت کی۔
