چٹگانگ ۔ 8 ۔ ستمبر (سیاست ڈاٹ کام) افغانستان کرکٹ ٹیم کے سابق کپتان محمد نبی نے اعلان کردیا ہے کہ وہ بنگلہ دیش کے خلاف کھیلے جارہے رواں ٹسٹ کے بعد طویل ترین کرکٹ سے سبکدوش ہوجائیں گے ۔ 34 سالہ آل راؤنڈر جنہوں نے افغانستان کے اب تک کھیلے گئے تمام تین ٹسٹ مقابلوں میں ٹیم کی نمائندگی کی ہے۔ وہ کل اپنے کیریئر کا آخری دن ایکشن میں نظر آئیں گے ۔ انہوں نے کہا ہے کہ ٹسٹ کرکٹ تمام کھلاڑیوں کے لئے اہمیت کی حامل کرکٹ ہوتی ہے۔ تاہم 18 سال تک افغانستان کرکٹ کی خدمات انجام دینے کے بعد اب وہ چاہتے ہیں کہ نوجوان کھلاڑی ٹیم کے سفر کو آگے بڑھائیں۔ انہوں نے مزید کہا کہ ان کا خواب تھا کہ افغانستان کی ٹیم کو ٹسٹ کھیلنے والی ٹیم کا موقف حاصل ہوجائے اور ان کا خواب پورا بھی ہوا ۔ محمد نبی کے بموجب ٹیم کو سال میں ایک یا دو ٹسٹ مقابلہ کی کھیلنے کو ملیں گے ، لہذا وہ چاہتے ہیں کہ ابھرتے نوجوان کھلاڑیوں کو موقع مل سکے ، اس لئے وہ ٹسٹ کرکٹ سے دوری اختیار کر رہے ہیں ۔ وہ ونڈے اور 20 ٹوئنٹی ٹیم کو دستیاب رہیں گے ۔
