ناکامیوں کو کامیابی کی سیڑھی کے طور پر استعمال کرنے کی ضرورت، کریم نگر میں سمینار، الیکشن کمشنر سی پارتھا سارتھی کا خطاب
کریم نگر ۔ ریاستی الیکشن کمشنر سی پارتھا سارتھی نے نوجوانوں پر زور دیا ہے کہ وہ محنت اور اعتماد کے ساتھ تعلیم حاصل کریں اور نوکری حاصل کریں۔ ہفتہ کو کلکٹریٹ آڈیٹوریم میں کلکٹر آر وی کرنن کی سرپرستی میں گروپ-1، ایس آئی وغیرہ کے مقابلہ جاتی امتحانات سے متعلق ایک شعور بیداری سیمینار کا انعقاد کیا گیا۔ مہمان خصوصی کی حیثیت سے شرکت کرتے ہوئے انہوں نے کہا کہ ریاستی حکومت کی طرف سے جاری کردہ بھرتی کے مواقع سے استفادہ کیا جائے اور اگر منظم طریقے سے مطالعہ کیا جائے تو ملازمت حاصل کی جاسکتی ہے۔ انہوں نے کہا کہ پرانے سوالیہ پرچوں کا تجزیہ کیا جائے اور امتحانات میں ہر سوال اور ہر نمبر کو اہم اور توجہ، مستقل مزاجی اور مضمون کی معلومات کے ساتھ تیار کیا جائے۔ انہوں نے یہ بھی کہا کہ وہ ایک دیہی متوسط طبقے کے خاندان سے آئے ہیں اور انہوں نے مشورہ دیا کہ طلباء کو اس یقین کے ساتھ اپنی تیاری جاری رکھنی چاہئے کہ انہیں نوکری ملے گی جو لوگ محنت سے مطالعہ کرتے ہیں وہی فاتح ہوں گے۔ انہوں نے کہا کہ چھوٹی چھوٹی رکاوٹوں کو ناکامی کے طور پر نہ دیکھا جائے اور انہیں کامیابی کی سیڑھی کے طور پر استعمال کیا جائے۔ کمشنر نے مشورہ دیا کہ ہدف کو مستقل مزاجی کے ساتھ حاصل کیا جائے۔ کلکٹر آر وی کرنن نے کہا کہ ضلع میں واردھی سوسائٹی، بی سی، ایس سی، ایس ٹی اور اقلیتی اسٹڈی سرکل کے ذریعہ ٹریننگ دی جارہی ہے۔ بیروزگار نوجوانوں کے لیے بنائی گئی ورادھی ایپ کو استعمال کرنے کا مشورہ دیا گیا ۔ سی پی ستیہ نارائنا نے کہا کہ آپ کی کامیابی آپ کے ہاتھ میں ہے اور غیر ضروری افواہوں پر یقین کیے بغیر پڑھیں۔ اس موقع پر ایڈیشنل کلکٹر شیام پرساد لال، زیڈ پی سی ای او پرینکا، ڈپٹی ٹرانسپورٹ کمشنر مامنڈلا چندر شیکھر گوڑ، واردھی سوسائٹی آفیسر انجانے یولو، ایس سی، ایس ٹی، بی سی، اقلیتی بہبود محکمہ کے ضلعی افسر نتھانییل، گنگارام، راجہ منوہر، مدھوسودن اور اسٹڈی سرکل ڈائرکٹرس اس موقع پر موجود تھے۔