نریندر مودی کے 2026ء تک نکسلائٹس کو مکمل ختم کرنے کے عزم میں ہماری ریاست اہم رول ادا کرے گی: وزیر اعلی
بھوپال: مدھیہ پردیش کے وزیر اعلیٰ ڈاکٹر موہن یادو نے کہا کہ وزیر اعظم نریندر مودی نے سال 2026 تک نکسلیوں کو مکمل طور پر ختم کرنے کا عزم ظاہر کیا ہے اور مدھیہ پردیش اس سمت میں سرگرم رول ادا کرے گا۔ سرکاری ذرائع کے مطابق وزیر اعلیٰ ڈاکٹر یادو نے نکسل مٹاؤ مہم کے سلسلے میں کل یہاں منعقدہ میٹنگ میں سینئر افسران کو ضروری ہدایات دیں۔ ڈاکٹر یادو نے کہا کہ وزیر اعظم نریندر مودی نے سال 2026 تک نکسلیوں کو مکمل طور پر ختم کرنے کا عزم ظاہر کیا ہے ۔ مدھیہ پردیش اس سمت میں سرگرم رول ادا کرے گا۔ ریاست کے نکسل متاثرہ علاقوں میں کئے جارہے ترقیاتی کاموں کا باقاعدگی سے جائزہ لیا جائے ۔ نکسلی سرگرمیوں کو مؤثر طریقے سے کنٹرول کرنے کے لیے ضلع سطح اور پولیس ہیڈکوارٹر سے لے کر ریاستی حکومت کی سطح تک مسلسل جائزہ لیا جا رہا ہے۔ انہوں نے کہا کہ متاثرہ علاقوں میں سڑکوں کی تعمیر، ٹیلی مواصلات کے ذرائع کی توسیع اور ضروری فوجیوں کی تعیناتی کے ذریعے نکسل عناصر پر قابو پانے میں کامیابی حاصل کی جا رہی ہے ۔ ترقیاتی کاموں کو جاری رکھا جائے اور جدید آلات کے استعمال اور علاقے کی مسلسل نگرانی کے ذریعے نکسلائیٹ عناصر کو ختم کرنے کی کوششیں تیز کی جائیں۔ وزیر اعلیٰ نے کہا کہ ملک میں نکسل ازم کو ختم کرنے کی مہم چلائی جا رہی ہے ۔ نکسل ازم کو کسی بھی قیمت پر ریاست میں قدم جمانے کی اجازت نہیں دی جائے گی۔ نکسل ازم کو مکمل طور پر ختم کرنے کے لیے سخت ترین کارروائی کی جائے گی۔ وزیر اعلیٰ نے خصوصی ڈائرکٹر جنرل آف پولیس (نکسل) پنکج سریواستو کو ہدایت دی کہ وہ ہر پندرہ دن میں نکسل مٹاؤ مہم کا جائزہ لیں۔ میٹنگ میں وزیر اعلیٰ نے بالاگھاٹ اور آس پاس کے علاقوں میں نکسلیوں کے خلاف کی گئی کارروائی کی بھی تعریف کی۔ انہوں نے حال ہی میں بالاگھاٹ میں پولیس اور نکسلیوں کے درمیان تصادم میں چار نکسلیوں کو ہلاک کرنے کی کارروائی کے لیے پولیس افسران کو مبارکباد دی۔ وزیر اعلیٰ نے گزشتہ سال ریاست میں نکسل ازم کے خلاف اٹھائے گئے اقدامات کو اہم بتایا۔ میٹنگ میں مدھیہ پردیش سمیت چھتیس گڑھ، مہاراشٹر، آندھرا پردیش اور تلنگانہ کی ریاستوں کی طرف سے مشترکہ مہم کے ذریعے نکسلیوں کو ختم کرنے کے عزم پر بھی تبادلہ خیال کیا گیا۔ ڈاکٹر یادو نے کہا کہ ریاستی حکومت نکسل متاثرہ علاقے کے باشندوں کی معاشی اور سماجی ترقی کے لیے مسلسل کام کر رہی ہے ۔ اس سلسلے میں مربوط کوششیں بڑھائی جائیں۔ آسان کنکٹی ویٹی کے لیے موبائل ٹاورز لگانے کا کام ترجیحی بنیادوں پر مکمل کریں۔ انہوں نے نئے سکیورٹی کیمپوں کے قیام کے لیے ہاک فورس کی تعداد میں اضافے کی منظوری کے لیے کارروائی کرنے کی بھی ہدایات دیں۔
میٹنگ میں چیف سکریٹری انوراگ جین، ایڈیشنل چیف سکریٹری چیف منسٹر آفس ڈاکٹر راجیش راجورا، ایڈیشنل چیف سکریٹری ہوم جے این کنسوٹیا، ڈائرکٹر جنرل آف پولیس کیلاش مکوانا اور محکمہ ٹیلی کمیونیکیشن اور بی ایس این ایل، مدھیہ پردیش سرکل کے سینئر افسران موجود تھے ۔