بھوپال: مدھیہ پردیش کی 15ویں قانون ساز اسمبلی کا مانسون اجلاس آج شروع ہوا جو پانچ دن تک چلے گا۔ اجلاس کے پہلے دن آج ایوان میں آنجہانی سابق اراکین اور معززین کو خراج عقیدت پیش کیا گیا۔ اس سے پہلے اسپیکر گریش گوتم نے قانون ساز اسمبلی میں قائد حزب اختلاف ڈاکٹر گووند سنگھ کو مناسب شناخت دینے کی رسمی کارروائی مکمل کی۔ ڈاکٹر سنگھ کے اپوزیشن لیڈر بننے کے بعد یہ پہلا اجلاس ہے ۔ ایوان کا اجلاس شروع ہونے سے پہلے اسپیکر مسٹر گوتم کی صدارت میں ایوان کے کام کاج کا تعین کرنے کے سلسلے میں بزنس ایڈوائزری کمیٹی کی میٹنگ ہوئی، جس میں وزیر اعلیٰ شیوراج سنگھ چوہان، قائد ایوان اپوزیشن ڈاکٹر گووند سنگھ، پارلیمانی امور کے وزیر ڈاکٹر نروتم مشرا، شہری ترقیات اور ہاؤسنگ کے وزیر بھوپیندر سنگھ، سابق وزراء سجن سنگھ ورما اور ڈاکٹر وجے لکشمی سدھو اور دیگر اراکین موجود تھے ۔ کمیٹی کی میٹنگ میں قانون ساز اسمبلی کے پرنسپل سکریٹری اے پی سنگھ بھی موجود تھے ۔ اس سیشن کے دوران پانچ اجلاسوں کی تجویز ہے ، جو ہفتہ 17 ستمبر تک تجویز کی گئی ہے ۔ یہ 15ویں قانون ساز اسمبلی کا بارہواں اجلاس ہوگا۔
اس سے قبل گزشتہ شام حکمران جماعت بھارتیہ جنتا پارٹی (بی جے پی) اور اپوزیشن کانگریس کی قانون ساز پارٹی کی میٹنگیں بھی ہوئیں۔ جہاں کانگریس نے بدعنوانی، کسانوں اور دیگر عوامی مسائل سے متعلق مسائل کو اٹھانے کی حکمت عملی بنائی ہے ، وہیں بی جے پی نے اپوزیشن کے حملے کا جواب دینے کی حکمت عملی پر تبادلہ خیال کیا۔
