حیدرآباد 15 جنوری ( یو این آئی) آندھراپردیش کے اضلاع گنٹور، کرشنا، مشرقی و مغربی گوداوری کے ضلع انتظامیہ کی جانب سے سنکرانتی کے موقع پر مرغوں کی لڑائی کے روایتی کھیل پر نظر رکھنے کے لئے وسیع انتظامات کئے گئے ہیں۔ پولیس نے خلاف ورزی کرنے والوں کے خلاف معاملات درج کئے ہیں اور کئی مقامات پر مرغوں کو ضبط بھی کیا گیا۔ پولیس نے اراضی مالکین کو انتباہ دیا کہ مرغوں کی روایتی لڑائی کے لئے اراضی کو مہیا نہ کروائیں۔ سنکرانتی کے موقع پر شرطیں لگا کر مرغوں کی لڑائی کا اہتمام ساحلی آندھراپردیش کے اضلاع میں کئی صدیوں سے جاری ہے ۔ اس کے لئے مرغوں کو سال بھر تیار کیاجاتا ہے ۔اس کے لئے خاص مرغ لائے جاتے ہیں اور سٹہ بازی کرتے ہوئے ان کی لڑائی کا اہتمام کیا جاتا ہے ۔لڑائی کے موقع پر مرغوں کے پیروں پر تیز دھار چھوٹی چاقو لگائی جاتی ہے تاکہ مخالف مرغ کو زخمی کیاجاسکے ۔مرغوں کی لڑائی کو روکنے کے لئے عوام میں بیداری بھی پیداکی گئی اورکہا گیا کہ مرغوں کو لڑانا ایک جرم ہے ۔ جگہ جگہ بینر نصب کئے جارہے ہیں۔
