حیدرآباد۔ یکم فروری ( یو این آئی) وزیر ریلوے اشوینی ویشنو نے کہا ہے کہ وشاکھاپٹنم ریلوے زون کیلئے 53 ایکر اراضی دینے کی خواہش کی گئی لیکن حکومت آندھراپردیش نے اراضی حوالے نہیں کی ہے ۔ انہوں نے کہاکہ اس کیلئے ڈی پی آر تیار ہے ۔ دہلی میں میڈیا سے بات کرتے ہوئے انہوں نے کہا کہ مرکز میں بی جے پی اقتدار سے پہلے 2009 تا 2014 متحدہ آندھراپردیش میں ریلوے کیلئے 886 کروڑ روپے الاٹ کئے گئے تھے تاہم تازہ بجٹ میں صرف اے پی کیلئے 9138 کروڑ الاٹ کئے گئے ۔ آندھرا میں 240کلومیٹر نئے پٹریوں کا کام کیا جائے گا۔ انہوں نے کہا کہ ریلوے لائنس کو برقیانے کا کام تقریباً 98 فیصد مکمل کرلیا گیا ۔ تلنگانہ میں ریلویز کیلئے 5071کروڑ مختص کئے گئے ہیں۔ ریاست میں ریلوے لائنس کو برقیانے کا کام صدفیصد مکمل کرلیا گیا ۔ گذشتہ 10 سالوں میںمختلف مقامات پر 414 پلیٹ فارمس، انڈرپاسیس کی تعمیر کا کام کیا گیا ہے ۔ قاضی پیٹ میں کوچ فیکٹری کا وزیراعظم مودی نے سنگ بنیاد رکھاتھا جس کے کام جاری ہیں۔
