ہندوستان کیلئے کچھ مثبت کام کریں ،تبھی ملک ترقی کرے گا ، کجریوال کی حکومت پر شدید تنقید
نئی دہلی : عام آدمی پارٹی (اے اے پی) کے قومی کنوینر اور دہلی کے وزیر اعلی اروند کجریوال نے مرکزی حکومت پر الزام لگایا ہے کہ وہ 24 گھنٹے سنٹرل بیورو آف انویسٹی گیشن (سی بی آئی) ۔ انفورسمنٹ ڈائریکٹوریٹ (ای ڈی) کے ذریعے پوری قوم کو ڈرا رہی ہے ۔ انہوں نے کہا کہ ملک کے لیے کچھ مثبت کام بھی کریں، تب ہی ملک آگے بڑھے گا۔بھارتیہ جنتا پارٹی (بی جے پی) کے اسٹنگ آپریشن پر صحافیوں کے پوچھے گئے سوال پرکجریوال نے کہا کہ نائب وزیر اعلیٰ منیش سسودیا نے کہا ہے کہ سی بی آئی کی تحقیقات چل رہی ہے ۔ تمام اسٹنگ آپریشن سی بی آئی کو سونپ دیں۔ سی بی آئی کو پیر تک تحقیقات کرنے دیں۔ چار دن بہت ہیں۔ اگر کچھ غلط ہو تو گرفتار کر لیں اور اگر غلط نہ ہو تو پیر کو معافی مانگیں۔عام آدمی پارٹی کے قومی کنوینر نے کہا کہ آج تک سمجھ نہیں آیا کہ شراب گھپلہ کیا ہے ؟ پہلے بی جے پی والوں نے کہا کہ 1.5 لاکھ کروڑ روپے کا ہے ۔ دہلی کا بجٹ صرف 70 ہزار کروڑ روپے کا ہے ، ڈیڑھ لاکھ کروڑ روپے کا گھپلہ کیسے ہوا؟ ان کے ایک اور لیڈر نے کہا کہ آٹھ ہزار کروڑ روپے کا گھپلہ ہے ۔ ان کے تیسرے لیڈر نے کہا کہ 1100 کروڑ روپے کا گھپلہ ہے ۔ اس کے ساتھ ہی لیفٹیننٹ گورنر نے کہا کہ 144 کروڑ روپے کا گھپلہ ہے اور سی بی آئی نے اپنی ایف آئی آر میں لکھا ہے کہ ایک کروڑ روپے کا گھپلہ ہے ۔ سی بی آئی نے منیش سسودیا کے ٹھکانے پر چھاپہ مارا تو ایک پیسہ بھی نہیں ملا۔ ان کے لاکر میں بھی کچھ نہیں ملا۔ سی بی آئی والے بھی ان کے گاؤں سے ہوتے ہوئے آئے ۔ سی بی آئی نے ان کے گاؤں والوں سے پوچھا کہ کیا منیش جی نے کوئی زمین وغیرہ خریدی ہے ۔انہوں نے کہا کہ میں سمجھتا ہوں کہ صبح سے شام تک سی بی آئی۔ای ڈی کرنے کے بجائے مرکزی حکومت کو بھی ملک کے لئے کچھ مثبت کام کرنا چاہئے ۔ ملک کے لیے مثبت کام نہیں کریں گے تو ملک کیسے ترقی کرے گا۔ کجریوال نے جمعہ کو ایک پریس کانفرنس میں کہا کہ دہلی ملک کی راجدھانی ہے ۔ دہلی والے ہی نہیں ملک بھر کے لوگ چاہتے ہیں کہ دہلی ایک خوبصورت شہر ہو۔ دہلی والے چاہتے ہیں کہ دہلی شہر خوبصورت ہو، تو وہ اچھا محسوس کریں اور اچھے ماحول میں رہ سکیں۔ اہل وطن چاہتے ہیں کہ کوئی باہر سے آئے تو انہیں یہ محسوس ہونا چاہیے کہ وہ ایک اچھے ملک کی خوبصورت راجدھانی آئے ہیں۔ دہلی کے اندر ہم نے تعلیم، صحت، بجلی، پانی سمیت کئی شعبوں میں بہت سی اصلاحات کیں، لیکن صفائی کا نظام بہت خراب ہے ۔ دہلی کے اندر چاروں طرف کچرا ہے ۔ اس کے لئے سب شرم بھی آتی ہے کہ ہماری دہلی اتنی گندی کیوں ہے ؟ خاص طور پر کچرے کے یہ تین پہاڑ بھلسوا، غازی پور اور اوکھلا ہیں، اس کے ارد گرد رہنے والی آبادی کے لیے زندگی کافی مشکل ہوگئی ہے ۔