ترواننتا پورم: مرکزی ہاؤسنگ، شہری امور، پٹرولیم اور قدرتی گیس کے وزیر ہردیپ سنگھ پوری نے ہفتہ کو کہا کہ مرکزی حکومت کی طرف سے شروع کی گئی مختلف اسکیموں کا مقصد ملک کے غریب اور محروم طبقات کی فلاح و بہبود کرنا ہے ۔ پوری نے یہ بات کیرالہ کے پلکاڈ ضلع کے وانیام کلم پنچایت میں مرکزی حکومت کی ترقیاتی اور فلاحی اسکیموں کو لوگوں تک پہنچانے کے لیے منعقد کی گئی ‘وکاس بھارت سنکلپ یاترا’ کی افتتاحی تقریب کے دوران کہی۔ انہوں نے کہا کہ ملک میں انفراسٹرکچر تیزی سے ترقی کر رہا ہے اور غریب لوگ اس سے مستفید ہو رہے ہیں۔انہوں نے کہا کہ بنیادی ڈھانچے کی ترقی میں عالمی معیار کو یقینی بنایا گیا ہے ۔ سال 2014 میں ملک میں 74 ہوائی اڈے تھے جو اب بڑھ کر 150 سے زائد ہو گئے ہیں۔ ریلوے وندے بھارت سمیت ٹرینوں کے ذریعے آگے بڑھ رہا ہے ۔ گیارہ کروڑ سے زیادہ گھروں میں بیت الخلاء بنائے گئے ہیں۔ پردھان منتری آواس یوجنا کے تحت چار کروڑ سے زیادہ گھر بنائے گئے ہیں۔ مزید میڈیکل کالجز بنائے گئے ہیں۔
