سنجے راوت کا بیان، ’’سرفہرست دس صنعت کاروں نے میڈیا اداروں کو خرید لیا ہے
ممبئی:شیوسینا رکن پارلیمنٹ سنجے راوت نے آئندہ لوک سبھا انتخاب کو لے کر انتہائی اہم بیان دیا ہے۔ انھوں نے برسراقتدار بی جے پی کو تنقید کا نشانہ بناتے ہوئے کہا کہ ’’2024 میں اس اتحاد کی حکومت مرکز میں بنے گی جس میں کانگریس اہم پارٹی ہوگی۔‘‘ یعنی کانگریس قیادت والے اتحاد کی کامیابی کی بات سنجے راوت نے میڈیا کے سامنے رکھی۔ انھوں نے پریس کلب کے ذریعہ منعقد جے ایس کراندیکر میموریل لیکچر دینے کے بعد یہ بات کہی۔ انھوں نے واضح لفظوں میں کہا کہ ’’بغیر کانگریس کے کوئی حکومت نہیں بن سکتی جو ملک کی اہم اور گہری جڑوں والی پارٹی ہے۔ کانگریس اہم اپوزیشن پارٹی بھی ہے۔ دیگر پارٹیاں علاقائی ہیں۔‘‘جب سنجے راوت سے پرشانت کشور کے اس بیان پر رد عمل ظاہر کرنے کے لیے کہا گیا کہ کئی دہائیوں تک بی جے پی اقتدار میں رہے گی، تو انھوں نے کہا کہ ’’بی جے پی ہندوستانی سیاست میں رہے گی، لیکن اپوزیشن پارٹی کی شکل میں۔ میڈیا کو ایمرجنسی میں بھی اتنا نہیں روکا گیا، جس طرح آج روکا جا رہا ہے۔‘‘راوت نے یہ الزام بھی عائد کیا کہ مرکزی حکومت صرف اپنے حق میں خبریں چاہتی ہے۔ انھوں نے کہا کہ ’’ایک اخبار نے گنگا ندی میں تیرتی لاشوں پر خبر شائع کی تو انکم ٹیکس محکمہ نے اس کے دفاتر پر چھاپہ ماری کی۔‘‘ سنجے راوت نے الزام لگایا کہ جو صنعت و کاروبار کے لیے لائسنس چاہتے تھے، ان سے میڈیا اداروں میں سرمایہ کاری کرائی گئی تاکہ حکومت میڈیا پر کنٹرول کر سکے۔ شیوسینا کے راجیہ سبھا رکن سنجے راوت نے یہاں تک کہہ ڈالا کہ ’’سرفہرست دس صنعت کاروں نے میڈیا اداروں کو خرید لیا ہے۔ حکومت اس کے پیچھے ہے۔‘‘
