نئی دہلی : مرکزی حکومت نے ملک میں عدالتی کارروائی کو آن لائن کرنے کے لیے مہتواکانکشی ای کورٹ (الیکٹرانک کورٹ) اسکیم کے تیسرے مرحلے کو نافذ کرنے کا فیصلہ کیا ہے ، جس پر چار سال میں 7210 کروڑ روپے کی مالی سرمایہ کاری کی جائے گی۔ چہارشنبہ کو وزیر اعظم نریندر مودی کی صدارت میں مرکزی کابینہ کی میٹنگ میں کیے گئے فیصلوں کے بارے میں معلومات دیتے ہوئے اطلاعات و نشریات کے وزیر انوراگ ٹھاکر نے کہا، “کابینہ نے آج ای کورٹ فیز 3 کو منظوری دے دی۔ 2023-24 سے اگلے چار برسوں میں اس پر 7210 کروڑ روپے خرچ کیے جائیں گے ۔ فیز تھری کا بنیادی مقصد عدلیہ کے لیے ایک مربوط ٹیکنالوجی پلیٹ فارم بنانا ہے ، جو عدالتوں، قانونی چارہ جوئی اور دیگر اسٹیک ہولڈرز کے درمیان ایک ہموار اور کاغذ کے بغیر انٹرفیس فراہم کرے گا۔ مسٹر ٹھاکر نے کہا کہ اس کا مقصد پورے عدالتی ریکارڈ کی ڈیجیٹلائزیشن کے ذریعے ڈیجیٹل، آن لائن اور پیپر لیس عدالتوں کی طرف بڑھتے ہوئے انصاف کے عمل کو ہر ممکن حد تک آسان بنانا ہے ۔
