میدک ۔ 20 جنوری ۔ ( سیاست ڈسٹرکٹ نیوز ) مرکزی بی جے پی حکومت کی تباہ کن اور عوام مخالف پالیسیوں کے خلاف مزدوروں اور کسانوں کو متحد ہوکر جدوجہد کرنے کی ضرورت ہے، یہ بات سی آئی ٹی یو کے ریاستی صدر چکّا رامولو نے کہی۔ 19 جنوری کو مزدور۔کسان اتحاد دن کے موقع پر میدک کے پوسٹ آفس چوراہے پر سی آئی ٹی یو، زرعی مزدور سنگھم اور ریتھو سنگھم کے اشتراک سے منعقدہ عوامی جلسہ سے وہ بحیثیت مہمان خصوصی خطاب کر رہے تھے۔ انہوں نے کہا کہ 19 جنوری 1982 کو مزدور۔کسان مشترکہ جدوجہد کی اپیل کے دوران پولیس فائرنگ میں کسان شہید ہوئے تھے، تب سے ہر سال 19 جنوری کو مزدور۔کسان اتحاد دن کے طور پر منایا جا رہا ہے۔ چکّا رامولو نے الزام عائد کیا کہ موجودہ مرکزی حکومت کارپوریٹ طاقتوں کی خدمت میں غریب مزدوروں، کسانوں اور زرعی مزدوروں کے حقوق پر ضرب لگا رہی ہے اور مودی حکومت کی پالیسیوں کو عوام دشمن قرار دیا۔ انہوں نے اعلان کیا کہ 12 فروری کو ملک گیر مزدور ہڑتال ہوگی اور زرعی مزدوروں و کسانوں سے اس کی بھرپور تائید کی اپیل کی۔ اس عوامی جلسہ کی صدارت سی آئی ٹی یو کے ضلعی سکریٹری اے ملیشم نے کی جبکہ زرعی مزدور سنگھم کے ضلعی سکریٹری کے ملیشم اور ریتھو سنگھم کے ضلعی صدر باگیا نے بھی خطاب کیا۔ پروگرام میں سی آئی ٹی یو کے متعدد قائدین اور عوام کی بڑی تعداد شریک رہی۔
