بیجنگ: چین کے ساتھ کشیدگی کے باوجود امریکہ نے کرونا وائرس کے باعث وطن واپس بلائے گئے مزید 100 سفارت کاروں اور ان کے اہلِ خانہ کو دوبارہ چین بھیج دیا ہے۔خبر رساں ادارے ‘رائٹرز’ کے مطابق واشنگٹن ڈی سی کے قریب واقع ڈیلس ایئر پورٹ سے خصوصی چارٹر طیارہ سفارتی عملے اور ان کے اہلِ خانہ کو لے کر چہارشنبہ کو جنوبی کوریا کے دارالحکومت سول کے لیے روانہ ہوا جہاں سے اْنہیں طبی سہولیات سے آراستہ طیارے کے ذریعے چین کے شہر گوانگ زو بھیجا گیا۔امریکہ نے فروری میں کرونا کی وبا کے باعث چین کے مختلف شہروں میں تعینات اپنے 1200 کے لگ بھگ سفارتی عملے کو واپس بلا لیا تھا۔ رپورٹس کے مطابق امریکہ چین کے ساتھ ناکام تجارتی مذاکرات اور ہانگ کانگ سے متعلق اس کی متنازع قانون سازی کے باوجود اپنا تمام سفارتی عملہ چین میں تعینات کرنا چاہتا ہے۔ امریکی حکام کا کہنا ہے کہ آنے والے دنوں میں مزید خصوصی پروازوں کے ذریعے باقی ماندہ سفارتی عملے کو بھی چین روانہ کیا جائے گا۔
امریکی محکمہ خارجہ کے مطابق آئندہ چند روز میں مزید پروازیں امریکی سفارتی اہلکاروں کو لے کر چین کے دارالحکومت بیجنگ، شنگھائی اور گوانگ زو جائیں گی۔امریکی صدر ڈونالڈ ٹرمپ کی جانب سے چین کو کرونا وائرس کا ذمہ دار ٹھیرانے، دونوں ملکوں کے درمیان تجارتی تنازعات اور ہانگ کانگ سے متعلق چین کے حالیہ اقدامات کے باعث امریکہ اور چین کے تعلقات کشیدہ ہوتے جا رہے ہیں۔