دوحہ : خلیجی ملک قطر نے فلسطین کے مسئلہ پر اپنا موقف برقرار رکھنے کا اعلان کیا ہے ۔ قطری وزارت خارجہ نے کہاکہ فلسطین سے اُن کے ملک کے برادرانہ تعلقات بعض عناصر خراب کرنے کی کوشش کررہے ہیں لیکن وہ اپنے دیرینہ موقف پر قائم ہیں۔ قطر کا کہنا ہے کہ مسئلہ فلسطین کا حل اقوام متحدہ سلامتی کونسل کی قراردادوں اور بین الاقوامی قانون کے تحت ہونا چاہئے ۔ فلسطینی سرزمین سے اسرائیل کا قبضہ ختم ہو اور وہاں آزاد فلسطینی مملکت کا قیام عمل میں لایا جائے ۔ آزاد فلسطینی مملکت کا قیام دارالحکومت بیت المقدس کے ساتھ ہونا چاہئے اور تمام فلسطینی پناہ گزینوں کو واپس آنے کے حقوق دیئے جائیں ۔
