بی جے پی کی زیراقتدار کس ریاست میں لاؤڈاسپیکر پر اذان پر پابندی ہے‘ سنجے راوت کا سوال
مہاراشٹرا کے کسی مدرسے سے داڑھی بنانے کا اْسترا بھی نکل جائے تو وہ سیاست کو الوداع کہے دیں گے‘ وزیر اقلیتی امور جیتندر اوہاڑ نے راج ٹھاکرے کو چیلنج
ممبئی : مہاراشٹرا کی سیاست میں لاؤڈاسپیکر پر اذان کے معاملے پر سیاست تیز ہوتی جا رہی ہے۔ لاؤڈاسپیکر پر اذان پر پابندی سے متعلق مہاراشٹر نونرمان سینا (ایم این ایس) کے سربراہ راج ٹھاکرے کے متنازعہ بیان کا شیوسینا ترجمان سنجے راؤت نے جواب دیتے ہوئے کہا کہ راج ٹھاکرے کو پہلے یہ دیکھنا چاہیے کہ بی جے پی کے زیراقتدار والی کس ریاست میں لاؤڈاسپیکر پر اذان پر پابندی عائد کی گئی ہے۔ شیوسینا ترجمان اور رکن پارلیمان سنجے راؤت نے لاؤڈاسپیکر پر اذان پر پابندی پر کہا کہ مہاراشٹرا میں قانون کی پاسداری کی جاتی ہے، ریاستی وزیر داخلہ ہر کام قانون کے اصول و ضوابط کے لحاظ سے انجام دیتے ہیں۔ ریاست قانون کے حساب سے چلتی ہے۔واضح رہے کہ ممبئی میں گڑی پاؤڑا کے موقع پر ایک جلسے سے خطاب کرتے ہوئے مہاراشٹرا نونرمان سینا ( ایم این ایس) سربراہ راج ٹھاکرے نے متنازعہ بیان دیتے ہوئے مساجد سے لاؤاسپیکر کو ہٹانے کا مطالبہ کیا تھا۔ اس کے ساتھ راج ٹھاکرے نے مدارسِ اسلامیہ پر بھی حملہ کیا تھا۔ راج ٹھاکرے نے لاؤڈاسپیکر کے متعلق بیان دیتے ہوئے کہا تھا کہ اگر لاؤڈاسپیکر کے ذریعے دی جانے والی اذان کی آواز کو نہیں روکا گیا تو مساجد کے باہر اسپیکر پر ہنومان چالیسا بلند آواز میں بجایا جائیگا۔ راج کے بیان کے بعد ممبئی کے گھاٹ کوپر علاقے میں ایک مسجد کے باہر لاؤڈاسپیکر پر ہنومان چالیسا بجاکر کل ماحول خراب کرنے کی کوشیش کی گئی۔ اس سازش کو ممبئی پولیس نے ناکام کر دیا اور ایم این ایس لیڈر مہندر بھانو شالی کے خلاف کارروائی کرتے ہوئے اس کا لاؤڈاسپیکر ہی ضبط کر لیا ہے۔ پولیس نے بھانوشالی کو دوگھنٹے کی حراست کے بعد ساڑھے پانچ ہزار کے جرمانے اور سی آر پی سی کی دفعہ 149 کے تحت نوٹس دینے کے بعد رہا کر دیا۔ ممبئی پولیس کے ذرائعے کا کہنا ہے کہ شہر میں ایک مرتبہ پھر فرقہ وارانہ تناؤ پیدا کرنے کی سازش کی جا رہی ہے۔ پولیس اس قسم کے عناصر سے نمٹنے کے لئے تیار ہے۔این سی پی لیڈر اور حکومت مہاراشٹرا میں اقلیتی امور کے وزیر جیتندر اوہاڑ نے راج ٹھاکرے کو چیلنج کرتے ہوئے کہا کہ مہاراشٹرا کے کسی مدرسے سے داڑھی بنانے کا اْسترا بھی نکل جائے تو وہ سیاست کو الوداع کہے دیں گے۔ راج ٹھاکرے نے ریاست کے مدارسِ اسلامیہ میں پاکستانی حمایتی افراد کے ہونے کا بھی الزام عائد کیا تھا۔ اوہاڑ نے کہا کہ راج ٹھاکرے مہاراشٹر کی پْرامن فضا میں زہر گھولنے کا کام کر رہے ہیں۔ بی ایم سی انتخاب سے قبل راج ٹھاکرے مذہبی منافرت کا کھیل کھیل رہے ہیں۔ونچت بہوجن اگھاڑی کے سربراہ پرکاش امبیڈکر کے بیٹے سجات امبیڈکر نے ممبئی میں اپنے سیاسی کریئر کے پہلے جلسہ عام سے خطاب کرتے ہوئے کہا کہ مساجد کے سامنے ہنومان چالیسا بجایا جائے میں اس کا مکمل تعاون کرنے کو تیار ہوں بہ بشرطیکہ اس کی شروعات راج ٹھاکرے کے بیٹے امیت ٹھاکرے کریں۔ انہوں نے کہا کہ راج ٹھاکرے مذہبی منافرت پھیلاکر اپنی پارٹی کو بچانے کی کوشیش کر رہے ہیں۔