ریاض۔27 اپریل (سیاست ڈاٹ کام) سعودی عرب کی وزارت اسلامی امور و دعوت و رہنمائی نے کہا ہیکہ مملکت بھر کی مساجد میں جمعہ اور جماعت کی نماز پر پابندی برقرار ہے اور کرفیو میں گزشتہ روز نرمی دینے کے بعد بھی یہ پابندی ہنوز جاری ہے۔وزارت اسلامی امور نے یہ وضاحتی بیان سوشل مڈریا پر گردش کرنے والی ان افواہوں کی تردید میں ٹویٹر کے اپنے اکاؤنٹ پر جاری کیا ہے۔سوشل میڈیا پر دعوی کیا جارہا تھا کہ مملکت کی مساجد میں جمعہ اور جماعت کی نماز جلد بحال کی جانے والی ہے۔ یہ بھی کہا جا رہا تھا کہ تواریخ متعین کردی گئی ہں اور کسی بھی وقت اعلان کردیا جائے گا۔وزارت اسلامی امور نے بیان میں مزید کہا کہ عام مساجد اورجامع مساجدمیں نماز پر پابندی کا سلسلہ ہنوز برقرار ہے تاہم مساجد کی صفائی، اصلاح و مرمت اور سینیٹائزنگ کی کارروائی حفاظتی تدابیر کے طور پر کی جارہی ہے۔ بعض لوگوں نے مساجد میں صفائی، اصلاح و مرمت اور سینیٹائزنگ کی کارروائی کے مناظر دیکھ کر اپنی طرف سے یہ نتیجہ اخذ کیا تھا کہ یہ مساجد کھولنے کی جانب پہلا قدم ہے۔کئی لوگ اس میں اضافہ کرکے یہ بات بھی کہہ رہے تھے کہ مساجد بہت جلد کھلنے والی ہیں۔ یاد رہے کہ سعودی عرب نے کورونا وائرس کو پھیلاو کو روکنے کے لے حفاظتی اقدامات کے طور پر 17 مارچ 2020 کو مساجد میں نماز پر پابندی کا اعلان کیا تھا۔
