مسجد الحرام کے سب سے بڑے گیٹ کا کام تیزی سے جاری

مکہ۔مسجد الحرام کے سب سے بڑے گیٹ کی تعمیر و تزئین کا کام تیزی سے جاری ہے اور یہ توسیعی منصوبے کا اہم حصہ ہے۔ زائرین باب الملک عبدالعزیزسے براہ راست خانہ کعبہ جاسکیں گے۔منصوبہ مکمل ہونے پر فن تعمیر کا خوبصورت تحفہ بن جائے گا۔تفصیلات کے مطابق مکہ مکرمہ ایوان تجارت و صنعت نے غیرمنقولہ جائدادوں کی کمیٹی کے سربراہ اور جبل عمر کمپنی میں ڈیزائن ڈیولپمنٹ کیکنسلٹنٹ انس صیرفی نے کہا کہ کنگ عبدالعزیز گیٹ کا مزید حصہ مکمل کرلیا گیا ہے۔ صبح اس کا پردہ ہٹایاگیا تو زائرین خوبصورت فن تعمیر دیکھ کردنگ رہ گئے۔انس صیرفی نے کہا کہ باب الملک عبدالعزیز مسجد الحرام کے جنوب میں صدر دروازہ ہے۔ اسے گیٹ ایک بھی کہا جاتا ہے۔ اس کی تعمیر میں اعلی معیار کا تعمیراتی سامان، جدید ترین ٹیکنالوجی اور منفرد ڈیزائن کا لحاظ رکھا گیا ہے۔اس دروازے سے داخل ہوتے ہی زائر کے سامنے خانہ کعبہ آجاتا ہے۔ باب الملک عبدالعزیز میں قدم رکھتے ہی 300 میٹر کے فاصلے پر مکمل خانہ کعبہ زائر کے سامنے ہوتا ہے۔ نیا باب الملک عبدالعزیز پرانی جگہ سے 50 میٹر باہر کی طرف بنایا گیا ہے۔گیٹ کی مکمل اونچائی 51 میٹر ہے۔باب الملک عبدالعزیز کے 2 مینارہیں جبکہ ایک مینار 137 میٹراونچا ہے۔ یہ پرانے مینارے سے 90 میٹر اونچا بنایا گیا ہے۔