ریاض: سعودی حکومت کی جانب سے حرمین شریفین آنے والوں کی خدمات کے معیار کو بہتر سے بہتر کرنے کی سعی جاری رہتی ہے۔ اس کی ایک مثال حالیہ رپورٹ میں سامنے آئی جس میں بتایا گیا ہے کہ مسجد حرام میں ایسے ملازمین اور خدمت گاروں کو تعینات کیا گیا ہے جو آنے والے معتمرین اور زائرین سے 50 زبانوں میں گفتگو کرسکتے اور ان کو 50 زبانوں میں رہنمائی فراہم کرسکتے ہیں۔ مسجد حرام کے امور کیلئے جنرل پریزیڈنسی میں زبانوں اور ترجمہ سے متعلق ادارہ نے زبانوں اور ترجمہ کے اپنے منصوبہ مکمل کرلیا ہے اور اب مسجد حرام کے کوریڈورز میں زبانوں کی تعداد کو 50 عالمی زبانوں میں بڑھا دیا گیا ہے۔زائرین کو ان پچاس زبانوں میں ترجمہ کی سہولت 24 گھنٹے فراہم رہتی ہے۔ ادارہ برائے زبان و ترجمہ کا ہدف تھا کہ زائرین کو ان کی مادری زبانوں میں خدمت فراہم کی جائے اور سائل کو مسجد حرام کے اندر اور باہر کے مقامات کا اندازہ لگانے کیلئے رہنمائی فراہم کی جائے۔ نماز کے اوقات، دوروں کی تاریخوں، لیکچرز اور اسباق کے بارے میں سوالات کے جوابات اور استفسارات کے بارے میں وقتی رہنمائی وغیرہ بھی سب ان کی مادری زبان میں کی جاسکے۔ اسی لئے مسجد حرام میں ترجمہ کا پراجیکٹ شروع کیا گیا تھا۔ اس پراجیکٹ میں سرکاری اداروں اور دیگر شراکت داروں کا تعاون حاصل کیا گیا۔ سکیورٹی حکام، حج و عمرہ کی وزارت، سعودی ریڈ کریسنٹ اتھارٹی اور دیگر اداروں کے درمیان رابطے قائم کرکے مسجد حرام کے امور کو چلایا جا رہا ہے۔ اس سب کا مقصد مسجد حرام میں آنے والوں کو ہر طرح سے بہتر سہولت فراہم کرنا ہے۔ جنرل ایڈمنسٹریشن آف لینگویجز اینڈ ٹرانسلیشن کے ڈائریکٹر جنرل احمد الجمائی نے اس بات پر زور دیا کہ ایجنسی مسجد حرام میں زائرین کو فراہم کی جانے والی خدمات کے معیار کو بلند کرنے کی خواہاں ہے تاکہ نظام میں بہتری کا تسلسل برقرار رکھا جائے۔
