ریاض: حرمین شریفین کے امور کی انتظامیہ کے اعلان کے مطابق مسجد حرام کے قالینوں کی صفائی اور جراثیم سے پاک کرنے کی کوششوں میں اضافہ کر دیا گیا ہے۔ مسجد حرام کے اندر اور اس کے صحنوں میں 30 مقامات پر 35 ہزار سے زیادہ قالین تقسیم کیے گئے ہیں۔ ان کا مقصد اللہ کے مہمانوں کیلئے چوبیس گھنٹے صاف اور آرام دہ ماحول فراہم کرنا ہے۔انتظامیہ کے مطابق ہر ہفتے تقریبا 1500 قالینوں کو جدید آلات اور ماحول دوست مواد کے ذریعے دھویا جاتا ہے اور پھر جراثیم سے پاک کیا جاتا ہے۔ انتظامیہ نے اللہ کے مہمانوں سے گزارش کی ہے کہ وہ قالینوں کی صفائی برقرار رکھنے میں تعاون کریں۔ مزید یہ کہ قالین کو کھانے پینے یا بیٹھنے اور سونے کیلئے استعمال نہ کریں۔ اس طرح نمازیوں کو صاف اور پر امن ماحول فراہم کرنے کا سلسلہ جاری رکھنا آسان ہو گا۔
