لندن ۔ /16 نومبر (سیاست ڈاٹ کام) ایک مسلمان کو پارٹی کا امیدوار بنانے کیلئے مذہب کی بنیاد پر پرکھنے کا رویہ دیکھ کر ٹوری عہدیدار نے استعفیٰ دیدیا ، کائلی پیڈلی نے اسٹور برج میں لوکل پارٹی آفیسر اور ٹوری امیدوار کے عہدوں سے استعفیٰ دیدیا ہے ۔ انہوں نے کہا ہے کہ میں نے اپنی آنکھوں سے دیکھا کہ ایک مسلمان کو عبادت کرنے کی بنا پر اذیت پہنچائی گئی ۔ ارکان میں اسلاموفوبیا کی موجودگی کے باعث میں نے پارٹی سے استعفیٰ دیا ۔ کائلی نے کہا کہ میں اس انٹرویو میں موجود تھا جس میں ٹوری کونسل کے امیدوار سے سوالات کئے گئے کہ آپ دن میں کتنی مرتبہ نماز پڑھتے ہیں ۔ مسجد میں کتنی مرتبہ جاتے ہیں اس کے بعد ٹوریوں نے آپس میں گفتگو کی کہ کیا ہمیں کسی ایشیائی باشندے کو لینا چاہئے یا نہیں ۔ کائلی پیڈلی نے کہا کہ اس نے کنزرویڈو پارٹی کو کئی مرتبہ اس واقعہ کی شکایت کی لیکن کچھ نہیں ہوا ۔ بورس جانسن نے نقاب والی عورت کو لیٹر بکس سے تشبیہہ دی تھی ۔ جس کی تحقیقات کا مطالبہ اپنی جگہ موجود ہے ، ایک دفعہ ایک انٹرویو میں میں خود شامل تھا جس میں مذہب سے متعلق سوالات کئے گئے ۔ مسلم کونسل آف برٹین کے جنرل سکریٹری ہارون خان نے کہا ہے کہ مسلمان امیدوار سے مذہب سے متعلق سوالات کی بوچھاڑ کی گئی جو کہ ناقابل قبول ہے ۔
